清遠遊

岩岩weekend同爸媽去左清遠3D2N旅行, 

本來係睇禾雀花既, 不過因為天氣問題令到花期遲左, 所以改去香草世界. 

第一日行程係去陽州魚水風景區, 明山秀水泛舟湖上.

 

今次又再經過呢個杜步高架橋, 最高離地110米, 支柱幼幼咁都幾驚...

 

第二日就係遊覽神筆仙洞, 以溶洞黎講, 連州o個個大好多同靚好多. 

同埋D所謂神話/人物都好牽強, 幾強想像力都唔覺得係似.... 所以都冇乜心機影相.

 

到第三日, 首先去洪秀全既故居,

 

重點唔係個景點, 而係團友既對話:

女人: 洪秀金呀... 

男人: 洪秀全呀!! 

女人: 下? 全字黎架咩? 以為係金字添... 洪秀全係邊個黎架? 

男人: 洪秀全你都唔識, 死啦你!!

(洪秀全.... 唔知佢係邊個都應該at least聽過, 當你未聽過, 導遊o係車都講解左一輪啦...) 

好喇, 參觀完悶悶地既洪秀全故居, 就去花都既香草世界. 

呢度地方好大, 如果要行一次應該要兩個鐘, 

不過D花就真係麻麻地靚, 種地疏又唔係朵朵都開喎, 

再加上岩岩先去完花卉展, 就更加覺得呢度D花唔夠靚.

 

 

~~~~~~~~~~~~~~~~~~~~~~

春暖花開

又半個月冇打blog, 唔通我既生活真係咁少事值得紀錄?

工作既事唔多講, 工餘時間都不離睇波同埋影相,

睇波方面我同Thomas, 阿Per, 阿Wing, Anthony一齊去睇南華亞協,

都幾熱鬧喎, 有9,945人入場, 氣氛唔錯, 不過場波就麻麻地好睇啦,

都唔知係因為球隊表現唔好, 定係我唔投入..... 

其實宜家都少左好多入場喇, 唔係同同事去的話, 更加連有比賽都唔記得. 

~~~~~~~~~~~~~~~~~~~~~~~ 

影相方面, 上星期去左屯門大會堂幫三舅母影佢出show, 

第一次影舞台真係有D難度, 影到人又影唔到個backdrop, 影到個backdrop個人又爆晒光喎, 

好似話因為全場都用射燈既關係, 比較難影. 

佢地仲有一個term叫做"世界燈", 意思即係成個台都照光, 唔係只係射燈. 

不過睇相都覺得OK, 可能因為顏色好sharp, 閃閃下咩都覺得靚架啦. 

~~~~~~~~~~~~~~~~~~~~~~~~ 

今日我, Carol, Vivi同阿Per去左維園影花卉展, 

入到去真係不得了, 花多人多鏡頭多, 要攝位影相都唔易, 

睇下呢度有幾多部相機?

 

主題係報春花, 不過掛住影都冇為意D花叫咩名..... 

烈日當空之下乾煎左個幾鐘, 又踎低又起身又彎腰又舉手, 真係有D累架, 

D花雖然品種唔算多, 不過勝在開得好燦爛, 加上天氣好, 效果出黎都OK.

 

~~~~~~~~~~~~~~~~~~~~~~~