阿聰last day了

阿聰終於都last day了, 呢個星期同佢食左三個farewell lunch... 

山窿野人終於買左iphone 4, 教足佢一日之後終於識得用whatsapp, 同埋setup好個itunes. 

不過佢返到去搞唔搞得掂又係另一回事啦(今朝已經打黎問點解叉唔到電) 

唉, 好同事要走, 多少真係唔捨得, 仲要唔係呢頭返工, lunch都冇得約. 

希望佢去到o個邊OK啦.... 

~~~~~~~~~~~~~~~~~~~~~~~~~ 

過左一個星期, 我終於可以接受豪豬走左既事實, 同埋情緒都已經完全平伏番, 

紀念賽會o係青衣踢, 到時我一定會去, 對豪豬作最後既致敬. 

~~~~~~~~~~~~~~~~~~~~~~~~~

黑色復活節

四日既復活節假期完結了, 呢個黑色既四月我呢世都唔會忘記. 

復活節..... 可唔可以叫豪豬復活呀? 

到呢一刻, 我依然覺得可能豪豬會突然間走出黎話: 

「喂大家搞錯左, 唔好意思呀, o個個唔係我黎架, 痴線咩...」 

見到一個二個都懷念豪豬, 一段又一段既昔日片段重溫, 一張又一張既舊照片, 

彷彿豪豬仍然o係我地隔離, 佢既笑容佢既聲音都歷歷在目. 

呢幾日情緒低落, 大喊已經冇, 不過總係覺得搵唔到一個出口, 

可能要到佢出殯o個一日, 去到鞠個躬, 一切先可以有個終結, 先可以迫我自己去接受呢個殘忍既事實. 

~~~~~~~~~~~~~~~~~~~~~ 

如何面對　曾一起走過的日子..... 

~~~~~~~~~~~~~~~~~~~~~

豪豬, 一路好走....

今日2011年4月22日, 一早起身搭船去北角, o係船上面睇到一個消息.... 

親愛既豪豬選擇左自殺而離開我地, 我D眼淚係不受控制咁流, 

點解會咁架, 發生咩事呀? 一向笑容滿面, 開朗既豪豬點會自殺架? 邊個蝦佢呀?!?! 

一幕一幕o係球場既畫面重現眼前, 睇左十幾年波, over十年都係睇愉園既, 

豪豬球品好, 腳法細膩瀟灑, 對球迷更加係一等一既nice, 

當年因為雞仔同豪豬係隊友, 所以我好多時都會同豪豬傾計, 有D波飛都係豪豬留俾我既添. 

記得佢有一次代表香港隊出賽, 比賽前佢話希望球迷可以正面支持球員, 唔好柴台, 

結果o個場比賽入面, 一次"屌"字都冇出現過, 證明豪豬o係球迷心目中係幾有地位. 

佢退役之後, 我都好少機會睇佢比賽, 最多都係o係麥花巨睇佢踢小型球, 

見到面佢都會好nice咁打招呼吹兩咀, 一DD架子都冇. 

今日..... 豪豬走左, 唔好話我呢D閒人都咁傷心, 佢D隊友, 親人更加係心痛之至. 

希望大家真係要珍惜生命, 因為留o係世上既人係會十倍承受你既痛苦. 

十年前既合照(當時仲係用菲林機影):

 

~~~~~~~~~~~~~~~~~~~~~~ 

情緒低落, 第一個打電話俾我既竟然係朱嘉聰, 

雖然佢唔係知道呢件事而打俾我, 不過都好多謝佢安慰我. 

上星期vivi心情納悶而約我去影相, 今個星期輪到我心情納悶去影相, 

阿Per揸車同我地上左山頂, 行下散下心都幾好, 

因為如果我留o係屋企的話, 一定會更加屈埋屈埋, 所以好明白vivi所講: 朋友真係好重要. 

~~~~~~~~~~~~~~~~~~~~~~

即興隨影

點解D時間過得咁快架???? 

~~~~~~~~~~~~~~~~ 

尋日晏晝vivi打黎問我有冇野做, 不如出去影相喎, 

我地去左香港公園, 因為時間都有少少晏既關係, 所以影左一陣就走喇. 

呢張係我最Like既水點:

 

之後去左灣仔食野, 食完野搭船過尖沙咀影夜景, 今次由九龍影番過香港真係靚D呢, 

再加上撞岩幻彩詠香江, D相更加豐富.

 

~~~~~~~~~~~~~~~

攝影週末

好耐都冇吹雞去食奇味小廚, 岩岩星期五終於去到喇.... 

我地一行9人好虛陷(我, Carol, Martin, Emily, Thomas, Celia, Rebecca, 聰, Anthony), 

叫左唔知幾多個餸, 總之勁飽!!!

放工同carol, thomas, vivi去灣仔影夜景, 點知vivi漏左個腳架o係公司囉, 哈哈哈哈, 

不過我地都用D欄杆之類既野做支撐, 勉強都叫影到既, 係辛苦D, 

應該下次由尖沙咀影番過香港呢邊會靚D.

 

~~~~~~~~~~~~~~~~~~~~~ 

星期六又有outdoor活動, 就係去大埔滘自然教育徑遠足+攝影, 

今日都好熱鬧呀, 有我啦, Carol, Vivi, Per, Wing, Emily & BF, 大家都係抱住一個hea行既心態. 

o係大圍食完早餐就出發喇, 而今次的而且確係hea既, 

因為除左一開始上一輪樓梯之後, 都已經係平地, 最後落都係落得唔急. 

不過既然其中一個主題係攝影, 就梗係expect有花呀, 有流水咁架啦, 

點知花就真係冇, 流水就有DD啦, 不過好光冇filter都唔係好影到. 

行完hea山就搭車落九龍灣, 車上面大家都勁訓, 可能因為熱得滯令到人累啦, 

食完野就散喇, 我都好想快D返屋企沖個涼之後去剪頭髮. 

~~~~~~~~~~~~~~~~~~~~ 

由於想慳錢既關係, 我唔想去北角Calvin度整喇, 次次都一千銀落樓真係好金.... 

今次去番土瓜灣一間之前幫襯過既salon, 當然唔係上次出事o個間啦(一講起就火都黎), 

今日決定要從良, 染番黑個頭, 同埋剪番斜陰, 因為平陰真係好難搞.... 

搞完出黎我都覺得ok啦, 睇下聽日自己吹完咩效果先講(佢吹一定靚架嘛). 

~~~~~~~~~~~~~~~~~~~~~

腰痛....

腰骨痛到死死下..... 尋晚更加訓左落床之後唔郁得, 轉身都轉唔到, 

今日返到去, emily借左支安美露俾我用, 搽完又好似真係好D, 

不過頭先沖完涼之後開始發熱, 好似貼左十張暖貼o係身咁.... 

D熱散左之後就開始痛, 宜家試下撒隆巴斯, 希望有用啦, 我星期六仲要去行山架. 

~~~~~~~~~~~~~~~~~~~~~~ 

"凡事留一線, 日後好相見" 呢個道理原來好多人都唔明白, 

講埋D咁既說話對你有咩好處呢? 搞到人地有hard feeling你係唔係好爽? 

我唔明我唔明我唔明!!! 

心地唔好既人, 係唔會有好結果!! 

~~~~~~~~~~~~~~~~~~~~~~

真係六月飛霜

今日同阿聰詳談, 知道多D來龍去脈之後, 更加覺得氣憤難平. 

唉, 都冇得揀, 只可以無奈接受, 究竟邊個係人?邊個係鬼? 

公司少左個buddy, 真係極度失落..... 

冇左個好partner, 我諗今年既Q12我都唔會有心機做. 

~~~~~~~~~~~~~~~~~~~

WTF

兩個禮拜冇打日記, 一黎就黎D唔開心野. 

話說有兩個好同事要走了, 仲要係被迫走的, 真係好過份好過份!!! 

佢地做左十幾年啦, 安份守己又冇咩攻擊性, 咁都要迫人走, 搞X錯呀?! 

做人唔aggressive係唔係死罪呢? 點解唔可以俾人平平穩穩咁過日子? 

我天真到仲以為o個班女係好人(其實根本好少人我會覺得係壞人), 原來人不可以貌相係真既. 

開始覺得我做左咁多年人都係懞盛盛, 如果我個post唔係比較特別少同人正面衝突, 可能我都死左好耐. 

我又即管睇下佢地可以請咩人返黎, 先符合你地既要求, 因住有報應呀! 

~~~~~~~~~~~~~~~~~~~~