台北賞櫻之旅

過左成個星期先寫返台北賞櫻之旅, 因為呢個星期太身心疲憊喇.
我地四個(匙, sanrda, esther)上次一齊去旅行已經係2006年去大阪京都,
事隔六年終於可以再一齊去癲!!
星期五晨咁早六點幾就去到機場, 又餓又眼訓.....
閒逛之際撞到陳文輝, 原來傑志都係o個朝飛大馬去踢亞協喎,
咁就去搵埋佢一班隊友吹吹水仲影埋相, up上facebook之後大家以為我去送機,
我都唔知唔係傑志fans幾耐啦, 就算我係, 都真係冇咁神心, 哈哈.
~~~~~~~~~~~~~~~~~~~~
Day 1: 桃園機場 - 捷絲旅西門館 - 天元宮 - 淡水老街 - 西門町
落機出到機場都只係十一點幾, 搭客運去酒店放低行李(未夠鐘check-in)就出發去淡水.
我地呢次旅行最主要係賞櫻, 所以我地搭捷運去到淡水之後, 就再轉巴士上天元宮.
因為係花季既關係, 所以超多人超塞車, 幾經辛苦上到去, 又係一片人海.

沿途櫻花樹其實都唔係好密, 不過都算開得幾靚, 最緊要係天晴氣朗, 藍天白雲.
其實D花咁密, 求其影都靚架喇, 所以唔理三七廿一, 狂影返黎之再揀.

影完櫻花, 都經已身水身汗, 落番淡水之後真係要抖抖氣,
所以我帶佢地去上次食過夾餅店, 坐低醫醫肚先, 大家都食得好開心, 因為勁足料:

記得上次黎淡水, 本身都係想睇日落既, 點知班機delay左, 搞到去到已經天黑.
今次時間好充裕, 可以慢慢睇住個太陽落山, 真係好enjoy,
好可惜個magic hour唔太明顯, 否則更加完美.

睇完日落就返西門町喇, 我地去左食麻辣火鍋, 四個人可以兩個鍋四個湯底.
好好味又飽到飛起!!
~~~~~~~~~~~~~~~~~~~~
Day 2: 菁桐 - 平溪 - 十分 - 台北車站 - 酒店小休 - 師大夜市
由於呢日既景點路途比較遙遠, 所以九點鐘已經要出發.
搭捷運去木柵站, 轉巴士入去菁桐.
呢程巴士就精彩, 上到車冇位坐之餘又迫,
我地見好多阿婆都係一袋二袋好似買餸咁, 估佢地應該好快落車啦,
車程大約一個鐘, 九曲十三彎, 唔知點解越上越多阿婆, 一個阿婆落車, 另一個阿婆又上車,
原先估佢地好快落車既阿婆, 卒之我地落佢地都未落!!因咩解究搭咁遠車去買餸呀???

我地冇位坐當然就要緊握扶手, 架車又chok路又多彎, 腳未軟手先軟,

途中仲要有個小朋友嘔.... 嘩呢程車既環境真係好惡劣....

終於去到菁桐可以落車, 真係舒服晒.....
好快我地去到火車軌, 勁開心咁o係上面玩同埋影相,

o係菁桐鐵道故事館買左D紀念品, 再去左食「阿婆的日本冰」雪條降降溫.

又係周圍影相一陣, 就行路去下一站 - 平溪.
又熱又曬咁行左大半個鐘, 終於去到平溪老街,
呢度都幾旺, 我地入左去一間舖頭人食豆花冰降溫, 再影一陣相就搭火車去十分.

                 

 

去到十分, D人多到好似星期日既旺角咁....
呢度比起平溪多野睇同多野玩好多, 首先D舖頭o係火車軌兩旁已經好得意
再加上好多人o係度放天燈, 周圍都好colorful.

我地問左價, 原來NT100就可以放天燈, 咁岩我地四個人可以人一寫一面!
寫完之後, 工作人員好專業咁教我地擺pose影相, 見到放左上天o個一刻真係好開心.
希望我地寫既野可以成真!!!!!

放完天燈我地周圍行下, 同埋去左靜安吊橋,
一場黎到, 我鼓起勇氣行出去!!! 好彩都唔係好搖, 不過始終此地不宜久留.....

玩完平溪線, 就搭番火車去瑞芳, 趕頭趕命咁買飛轉車去台北車站, 因為miss左要等一個鐘呀.
其實呢個時間我地已經好鬼累, 去到台北車站坐低食個tea先.
Esther要去誠品圖買書, 我就去左佳佳唱片, 見到小豬隻Dante簽名版只係賣NT319,
諗左一陣, 最後決定要帶佢返屋企! (要諗既原因係我真心覺得呢隻日文碟唔好聽)
返酒店抖抖之後, 再去師大夜市.
搭捷運去台電大樓站, 我地跟住人潮就搵到師大夜市,
呢度確然賣D野係後生D既, 不過多人到爆, 想食野都根本埋唔到去....
我地累到一個地步, 係唔理o個間係咩, 總之有位就入去食,
卒之我地入左去burger king.... 哈哈, 仲要坐左人地個幾鐘, 先拖住疲乏既身軀返酒店.
~~~~~~~~~~~~~~~~~~~~
Day 3: 陽明山 - 台北車站 - 西門町 - 機場
第三日行程亦都係賞花既, 就係去陽明山.
o係台北車站搭巴士上陽明山, 上到去仲要再轉車去唔同既景點.

去到一個景點叫做「花鐘」, 我地一忙以為會似教堂o個隻吊鐘, 點知...:

真係吹脹...... 流到咁都得..... 個公園其實都冇乜花, 聽聞因為落過大雨, 打爛晒喎.
行左一陣我地就去第二個景點 - 竹子湖.
等車期間, 見到有檔賣豬血糕, 我講左好耐話要試架喇, 一直都冇食到,
(好想試係因為之後睇台劇「珍愛林北」, 陳妍希成日都買黎食)
今次見等車冇野做就去買黎試下啦, 果然一試難忘.....

咸唔係咸, 甜唔係甜, 稔唔係稔, 韌唔係韌, 都唔知點形容!
廿蚊台幣買個難忘既經驗.... 抵...... 哈哈
最後當然係丟左冇再食啦, 之後就上車去竹子湖.
上到去天氣忽然間變得又濕又凍, 仲落雨添! 好彩有帶遮又有帶褸.
呢度係睇海芋既, 人都係多, 不過花就唔多,
一來未係開得最靚既時候, 二來靚既已經摘晒黎賣.

呢度發生左一件驚險事件, 事緣我地搵左個地方放相機自拍,
點知有個阿婆行過時, 用隻手按住我部相機借力.... 部機當然俾佢推郁晒啦,
而o個個地方係橋上面既一枝柱, 橋下面係水黎架....
睇住部相機幾乎跌落水, 而o個個阿婆明知自己推到野,
佢完全冇意識去扶番穩, 更加望都冇望就行左去喎!!!
我真係頂佢個肺丫, 你唔小心郁到我唔怪你, 但係你都幫手扶一扶丫大佬!!
唉咁樣俾佢嚇一嚇, 真係人都熱埋.... 
睇完海芋, 就結束陽明山之行, 搭番巴士去北投.
o係北投轉車返去台北車站食野, 我地去左旅遊書介紹既「郭蒸餃」
我俾呢間野負五粒星!!! 餃子唔熱, 叫左酸辣湯, 嗌佢俾多兩隻匙羹佢話冇!!!
個湯似水多話似湯, 叫左小籠包, 嗌佢俾碗又冇!
後來發現點解佢唔俾羹又唔俾碗, 因為D小籠包係夾唔爛既, 皮厚又零汁!!
唉真係差到冇朋友!!!
我地好唔滿足咁去左另一間食水煎包, 呢度就完全唔同喇, 好熱又好食.

食完呢個包就返西門町喇, 我地好似生左大食積咁,
去左一間叫做「我就厲害」食燒肉,
呢度係用碳黎燒, NT499任食, 再加一個湯鍋, 飽到捧住個肚走呀!
飲飽食醉, 就返酒店拎番D行李, 搭的士去機場喇, NT900都真係抵.
~~~~~~~~~~~~~~~~~~~~    

三日兩夜台北行, 完全係體力既考驗!!!
身體雖然累, 不過精神上係relax左好多, 病都好左好多.
雖然一返到香港又咳....
~~~~~~~~~~~~~~~~~~~~

多事之春

岩岩好一個月冇寫blog, 除左懶, 都真係有D「唔知從何寫好」既感覺.
呢個月發生太多事了, 因為自己做錯野, 搞到成公司都反轉咁滯...
仲搞到同事要走, 雖然明知呢個唔係主因, 同埋背後係有political reason兼蘊釀左一排,
不過個心都真係千萬個唔安樂....
而自己都俾人批鬥左兩個星期, 日日都俾人話到喊（做左咁耐都未試過咁樣）,
預計黎緊都會繼續十盞大光燈照住自己做野, 真係要步步為營.
~~~~~~~~~~~~~~~~~~~~~
早三個星期約左班小學同學上劉民屋企燒野食,
本身諗住巴士去既, 點知臨出發o個朝, 阿滔打黎話車埋我去喎,
咁就梗係好啦, 大角咀對我黎講都幾liu lang.
上左車之後, 好笑既事情發生了....
原來大家都以為對方知道點去, 事實就當然兩個都唔知啦.
又用GPS, 又睇地圖, 卒之兜左成個鐘咁滯先去到,
去到又搵唔到位泊車, 泊左車又唔記得左邊條街先係劉民屋企...
兩個白痴終於上到去喇, 到咁上下佢要落去俾泊車錢, 又唔記自己架車泊邊.
好啦我地成班人燒野食, 估唔到劉民對紅酒都有D研究喎,
今次佢地算係飲得好斯文喇, 可能因為老婆o係度啦, 哈哈.
食到十一點幾就走喇, 一齊去攞車.
真係估佢唔到, 明明頭先都落左去入咪標, 宜家又唔記得泊左o係邊?!
好彩兜左兩個彎都搵到, 總之係搞笑啦.,
好彩今次車我返屋企冇行錯路啦, o係番土瓜灣係安全D既.
~~~~~~~~~~~~~~~~~~~~
病左個幾兩個星期, 一路都冇時間睇醫生, 莫講話sick leave啦,
終於上星期四睇左, 醫生話係流感喎....
都唔知同普通感冒有咩分別, 上網睇過好似話係嚴重D既感冒喎,
星期五, 未食晒D藥, 點知放工唔記得帶藥返屋企....
咁有星期六買D成藥食住先啦, 因為約左Joyce睇戲, 冇時間睇醫生.
我地去睇「星光夢裡人」, 之前睇trailor已經好有興趣, 因為係黑白默片!
買左飛o係油麻地百老匯電影中心睇, 出門口上左巴士都冇乜問題,
點知去到加士居道開始塞到行唔到, 原來係法輪功遊行!
頂佢個肺丫, 有乜理由會批准佢地o係最繁忙既街道遊行架?
成條彌敦道交通癱瘓, 搞到我落車行路, 都遲左15分鐘!
Joyce仲慘, 佢搭的士, 又o係窩打老道塞死晒, 最後遲左半個鐘先入到場.
可能因為miss左頭半個鐘既戲, 所以唔係好投入,
睇完套戲覺得好累, 一來本身病病地, 二來因為冇聲冇字幕, 搞到不自覺讀唇...
而劇情就真係好簡單, 最吸引係隻小狗, 好有戲.... 哈哈.
睇完戲我地去行街, 嘩睇水晶真係好罪過, 我好捨得咁六百幾蚊買左條紅紋手串!
為左行桃花運真係咩都做得出!! 哈哈!
不過最估唔到係Joyce, 佢完全仲des過我, 佢本身想買幾千蚊條o個D架,
不過我勸佢唔駛買咁貴架, 只係顏色問題, 只要都係紅紋, 效果其實一樣.
最後佢先買番條平D既, 不過折完都要七百幾, 仲要買埋個白晶簇...
白羊座既朋友真係去得好盡呀下!!
買完水晶都搞到十點幾, 我地o係SOGO對出既馬路講起我本身條月亮石手串,
句句子都未講完咋, 聽到啪啪啪聲, 原來條月亮石手串斷左呀!!!
當時我地o係馬路, 綠燈閃緊, 我一隻手要按住未跌落地既石, 得番Joyce幫我執.
執完數一數, 發覺少一粒, 不過望極地下都搵唔到, 都冇辦法啦,
估唔到一買新石, 舊石都自我毀滅.....
不過好好彩, 返到屋企除衫o個時, 剩番唔見左o個粒出現番喇!
得閒要再串番好佢地先, 唔平架!
~~~~~~~~~~~~~~~~~~~~
話說屋企用網上行, 一向都有用Router.
點知上星期開始時得時唔得, 打去技術支援搞左一輪都唔得, 約左師傅上黎整,
點知臨上黎o個日又好番, 就叫佢唔駛上黎啦,
到過左兩日, 又係咁上唔到網喎, 又係打去技術支援, 又係搞左一輪, 又係約師傅.
師傅黎到, 佢話係電話線接觸得唔好, 令到固網電話同上網有干擾,
佢換左個頭同個盒, 就上到網冇事, 不過要直插LAN線去電腦先得, 經Router就唔得,
師傅話我個Router有問題喎, 咁我就去買過個啦....
買到返黎setup, 頂丫又唔得既, D線係插岩晒架喎, 不過個modem同router好似talk唔到,
又拔又插又reset都唔得, 火都黎, 俾晒screen cap同插線既相Linus睇,
佢都話應該冇問題架喎, 最後手痕又拎番個舊Router黎試下,
竟然一插就用到, shit.... 玩死!!!
~~~~~~~~~~~~~~~~~~~~~