words with 孫耀威

宜家係西班牙vs葡萄牙既半場休息時間, 暫時打成0:0.

好緊張呀, 西班牙一定要出線呀!!!

~~~~~~~~~~~~~~~~~~~~~~

呢排喪玩words with friends, 重點係.... 我同孫耀威玩呀!!

話說佢有一篇微博影到佢個ipad, 當時係玩緊words with friends,

咁李焯庭叫孫耀威add佢, 孫耀威就post左自己個ID上出,

有見及此, 我又走去add佢黎玩啦, 點知佢真係同我玩喎, 超爆開心呀.

佢都玩得幾勁呀, 我一度落後過百分, 最後我都追到輸廿幾分, 算係咁啦.

宜家同佢玩緊第二個game喇.

~~~~~~~~~~~~~~~~~~~~~~~~

除左世界盃之外, 另一個盃都開始左喇, 就係一年一度既東南海盃.

一路都上網search下D賽程同埋各隊名單, 好可惜今年一D都搵唔到...

到尋晚八點, 契媽打黎問我睇唔睇波, 我本來都未get到佢講睇咩波,

原來係尋晚開波, 係八點開波..... 我出到黎都踢完啦.

唔知點解, 契媽仲要強調：「阿俊都o係度呀.」

搞錯呀, 冇人話我知架, 嬲嬲地喎...

(雖然我星期一anyway都要返學, 不過去唔去係一回事, 知唔知係另一回事)

我聽晚會出旺角, 自己抄賽程, 哼!

~~~~~~~~~~~~~~~~~~~~~~~~~

意大利.... :-(

意大利..... o係最後十分鐘力拚到底, 輸到1:3都冇放棄.

終於追番2:3, 不過都返魂乏術...... 分組賽出局.......

我哭了....

上一屆我都係哭了, 不過係吐氣揚尾喜極而泣.....

宜家.....天堂跌落地獄....

~~~~~~~~~~~~~

再見黎sir

岩岩過左既星期日, 黎新祥過左身.

知道佢患肺癌已經有一年幾, 見佢都一次比一次瘦,

上次細榮告別賽, 佢都有抱病黎捧場, 睇得出佢好錫D徒弟.

facebook上面個個球員都寫出佢對黎sir既心聲, 真係睇到有D心up,

佢地都係黎sir教大鬧大, 除左教佢地踢波, 仲教佢地做人,

希望黎sir一路好走, 佢地一定會記住你既教誨, 除左做個好球員, 仲會做個好人.

~~~~~~~~~~~~~~~~~~~~~

自海派甜心之後, 一排都冇煲劇喇,

終於又有一套令我有download既衝動, 就係 - 泡沫之夏.

呢套劇係由大S, 黃曉明, 何潤東主演.

唔係一般嘻嘻哈哈, 無啦啦有隻豬仔飛過鏡頭既偶像劇,

(講明先, 我對呢D浮誇野其實唔反感, 只係主演既人好睇, 我都好like)

反而係一套比較沉重既劇情片, 一集cut埋廣告都做個半鐘, 睇完真係會累.

我一口氣睇晒三集, 岩岩download埋第四集, 就可以同台灣同步喇.

~~~~~~~~~~~~~~~~~~~~~~

世界盃開鑼之後, 日日都狂睇波.

最失望都要數意大利, come on baby, 衛冕成唔成功都好, 千祈唔好分組賽出局!

另一隊愛隊西班牙都未踢得出強隊風範,

費托零態, 好彩韋拿夠fit, 希望快D打番起隊波.

~~~~~~~~~~~~~~~~~~~~~~

是我變了, 是你變了

相隔左幾個月再通電話, 純為左正經事先搵你.

當你一答完我之後, 我已經完全冇耐性聽你講自己野,

講左幾次拜拜你都唔收線, 仲係要講, 你有冇留意我冇心機聽架o者?

電話入面你對我既態度其實同以前一樣, 都係不停咁講,

你話你失蹤... 好老實, 我真係feel唔到你有失蹤....

因為我都冇理過你做緊乜野, 我已經唔再圍住你團團轉了.

有D野, 變左就係變左.....

變左既係我對你既態度, 不過你可能感覺唔到, 算啦, 你感覺如何都已經同我無關.

~~~~~~~~~~~~~~~~~~~~

撼角

講起都真係低能, 早兩日訓訓下覺, 一轉身就撼親左眼眼角,

此動作之高難度相信我都做唔到第二次 (touchwood)....

好彩紅紅瘀瘀個範圍唔大, 同埋都幾隱閉下o者, o係眼尾個三角摺位.

~~~~~~~~~~~~~~~~~~~~

探班

今日放工匆匆趕去鰂魚涌公園球場, 因為阿仙奴足球學校今日第一日上堂,

呀唔係, 我去球場既原因唔係因為佢地今日開課, 而係我約左阿俊俾野佢.

去到球場坐低, 睇左大半個鐘, D小朋友真係好搞笑,

豆丁咁細個就識踢波, 真係勁.

見到阿俊都好有心機好有耐性教佢地.

上完堂之後, 阿俊叫我一齊join埋去食飯,

我都冇預左同佢地食添, 因為唔係個個都識嘛.

(最好笑係有人無啦啦同我講: Cherry我下次先約你食飯啦,

and then大家一齊答佢: 佢一齊架, 你做咩叫人走o者!)

一齊去既仲有: 陳炳安, 林慶麟, Max, 穎琴同阿超.

本來話去權發既, 不過無啦啦有人話去茶餐廳, 好彩有人反對o者!!

最後都冇去權發, 去左附近一間食小菜既餐廳, 都ok好食既.

冇乜機會同呢D球壇前輩食飯, 佢地雖然唔識我, 不過都好nice咁同我講野呢.

到走o個時, 阿俊要落蘭桂芳搵個frd拎番部iphone, 咁我就自己去搭車啦,

阿超同穎琴又盲中中跟住我行喎, 我忍唔住問佢: 其實你搭咩車呢?

佢話: 地鐵囉.

我話: 傻架, 地鐵o個邊呀!

人行佢又行, 真係傻傻地, 穎琴都傻埋.... 哈哈

~~~~~~~~~~~~~~~~~~

我今日, 好開心.

~~~~~~~~~~~~~~~~~~

又係關你事....

知道有關足球學校既事, 點解你好似陰魂不散咁....

咁多教練你唔揀, 做咩你係都要揀佢o者?

咁多間足球學校唔教, 又係要教呢間架咩?

~~~~~~~~~~~~~~~~~~~~~

River Crabbed

冇諗過呢個時候你會同我講呢D野...

本來呢件事過去就由得佢過去, 根本冇得怪任何人, 我真心覺得唔應該怪你.

不過尋晚你講既野, 我冇傷心, 冇心痛, 而係覺得憤怒.

點解你要再傷害我呀? 你點解要咁自私?

一而再, 再而三咁唔理我感受, 點解係都要迫我憎你?

我真心真心希望你永遠消失, 你走啦, 唔好再同我講野, 唔好再o係我面前出現!

~~~~~~~~~~~~~~~~~~~~~~

尋晚開會開到七點幾, 放工同carol再戰車仔麵,

今次識得唔好落咁辣, 好好味呀!!!

食完野就上左carol屋企玩Wii fit, 第一次玩, 原來勁好玩架!!

最鍾意扮隻雞雞o係海面飛, 好得意呀, 原來我都識飛架!

玩到十點鐘到就走喇, 因為怕維園燭光晚會完結會好多人,

點知我走o個時, 已經出現人潮, 好彩都好快上到車, 不過勁塞.

知道sina微博D post不斷被河蟹, 第一次切身感到言論自由被剝奪既感覺,

唔知幾時香港會變成同大陸一樣呢....唉....

~~~~~~~~~~~~~~~~~~~~~~~~

頭先俾阿俊突襲, 五分鐘要我換好衫出門口拎野落樓下,

因為佢咁岩o係九龍城, 之後就再去教波喎, 都幾趕,

而我亦刷新紀錄呀, 十分鐘出門口, 不過唔該下次唔好再突擊....

~~~~~~~~~~~~~~~~~~~~~~~~

五月天

星期日去左大球場睇波, 係今季last一場比賽,

最後飛馬2:1贏左公民, 見到阿祺個樣勁失望囉,

同埋再一次捧邊隊輸邊隊, 唉希望世界盃唔係咁啦.

~~~~~~~~~~~~~~~~~~~~~

睇完波, 去睇五月天演唱會, 今次唔駛錢架, 係Martin個vendor送俾佢,

佢唔岩睇, 就送左俾同我celia, 真係勁開心呀.

我之前係一D都唔熟五月天既歌架, 不過一路都聽聞佢地既演唱會好好氣氛,

所以我都好期待, 亦用左唔夠一個星期既時間煲歌.

由零開始, 真係不知從何入手,

好彩vivi o係星期五晚俾左個rundown我睇, 有雞精書, 唔駛大包圍....

講番個concert, 一開場己經起晒身, high爆,

最impressed係個stage好大好靚, 好多animation, 同埋一個超大既transformer.

歌方面, 我都識七八成架, 好叻架喇, 哈哈.

佢地唱到十二點幾先完場, 抵爆.

睇完今次concert之後, 我已經愛上五月天喇,

佢地下次黎香港開show, 我一定會買$680飛, 同埋我會熟晒D歌先去.

~~~~~~~~~~~~~~~~~~