繼8月睇完舞台劇《神扒之間》, 9月16日竟然去左睇賈寶玉,
用到「竟然」呢兩個字係冇誇張,
首先我對《紅樓夢》既認識竟只係林黛玉同賈寶玉呢兩個人名而已, 其他係絕對零,
另外, 本人對何韻詩不嬲都冇乜興趣....
咁點解我會俾幾舊水去睇呢? 都係因為見佢載譽重演幾次D飛都大賣,
咪即管睇下囉, 橫掂呢排都喜歡睇舞台表演嘛.
先講座位, 由於貪平買左$280, 坐balcony睇得好辛苦.....
以前都試過一次睇舞台劇-男磨坊, 又係坐balcony,
又係好似o係人地屋頂裝人咁, 全程睇頭頂.... 都唔知做咩今次又重蹈覆轍!
不過上次因為個場細, 同埋得三個演員, 所以都仲OK,
今次個場大, 距離遠, 仲要全套劇不停咁十幾廿個人"chit chur咁轉", 睇到我頭都暈埋囉!
講番套劇, 都係自己冇做功課, 完全唔知《紅樓夢》講乜,
明明人地一開始已經用16x backward(倒敍)既速度講左一次, 我都跟唔到.
而最搞唔掂既地方, 係呢套劇用左一個好特別既演繹方法, 就係多人分飾一角.
一開始我以為佢地痴左線, 明明同一個角色, 做咩呢個又講一句對白, 呢個又講一句...
睇左我幾耐先適應到呀! 又要一時國語一時廣東話.... 總之就係睇到好攰!
坦白講我覺得係好悶, 中場休息之後, 我隔離有人走埋!
算啦, 當係我唔識欣賞D咁高深既舞台表演啦.....
~~~~~~~~~~~~~~~~~~~~~~
好似個個月都睇show咁, 岩岩睇左黃子華棟篤笑-洗燥.
今次豪買$480飛, 又係因為以為坐過山頂, 完全feel唔到D互動, 過癮度打晒折扣.
睇頭場有個好處, 就係唔會俾人爆晒D punch line出黎, 完全係新鮮.
我之前live都睇過好幾次, 由 「越大鑊越快樂」, 「嘩眾取寵」,「娛樂圈血淚史2」
到今次「洗燥」,原來已經係第四次喇, 我覺得今次比「娛樂圈血淚史2」好睇,
以下有劇透, 準備睇show既請迴避.
呢次有幾個位我勁like:
- 壽司o個part, 佢阿爺自製中式壽司, 成隻鳳爪揸住舊飯(重點係阿爺以前已經出過場, 要以前有睇先會識笑)
- 竉物基因改造, 基因序列係054K54 (你唔死佢唔死)
- 英文版既分飛燕
- 你老婆嬲到個唇同對眼痴埋一齊, 你要同佢過人世, 已經受到應有既懲罰
- 宜家用既錢唔係天文數字, 係地府數字, 要地府D人燒番銀紙上黎俾我地用.
- 最特別係微電影 - 廁所阿哥旋風腿, 一講宜家咩都會俾人影左放上youtube, 二講人生低潮係會低處未算低, 想搏番身咩? 分分鐘再仆多鑊. 但係當你以前絕望, 又會無啦啦俾你搏到喎, 因為太多野係你估唔到亦計有唔到. 金句:「冇公關, 食屎啦!」
當年SARS, 全香港甚至全世界負能量超晒標,
對份工不滿, 對政府不滿, 對社會不滿, 連對o係你隔離食魚蛋o個人都不滿.
大家既心態係: 人人都係仆街, 你唔係? 你最多係「未」仆街!
唉, 寫寫下好笑野, 搞到個人都灰灰地添.
宜家俾D大陸人搞到香港唔知似咩樣, 又驚共產黨治港,
想捍衛自由, 但係又出現好多政棍抽水抽到過晒火., 總之係就亂晒坑!
~~~~~~~~~~~~~~~~~~~~~~~
