大酒店有個荷李活

晨早買定飛, 期待左好耐既舞台劇「大酒店有個荷李活」終於有得睇.
已經預早左時間出門口, 點知等唔到巴士喎,
由於唔可以遲到既關係, 本人決定由土瓜灣搭的士去香港大會堂!!!
去到岩岩可以入場, 座位係good到不得了, 對正台前的第五行.

套劇係黑色幽默得睇好有共鳴, 大家都深受地產霸權所折磨,
但同一時間亦心知地產霸權係人人都有份做成.
「樹欲靜而風不息, 子欲養而親不在」- 老掉了牙既對白, 又有幾多人係及時明白?
入場之前有一段小告示, 大概係話會有演員身體著火既情況出現, 心諗有冇咁誇,
點知到o個一幕真係出現o係你眼前, 係堅驚架, 搵食o者, 駛唔駛咁搏呀?!
Gary哥哥做左咁多年舞台劇, 當然係駕輕就熟, 做到壓場感,
鄧健泓今次飾演一個殯儀館太子爺, 為左阿爸, 放棄自己做演員既理想去維持家族生意.
佢一開始都有因為自己對家庭作出既犧牲而抱怨,
不過到後來佢明白, 佢並唔係因為妥協而放棄理想,
而係另一個理想不斷咁呼喚佢! 呢個理想我自己就解讀為愛親人.
好彩我自己一向對家人都好好, 希望自己唔會遺憾.
~~~~~~~~~~~~~~~~~~~~~~~~~~~~
謝幕既時候, 編劇話鄧健泓同Gary哥哥會同大家簽名, 不過要買Poster先.
本身都冇諗住買架喇, 不過後來決定折返!
因為唔想錯過呢D千載難逢可以同鄧健泓影相既機會.
後來當然係買左Poster, 鄧健泓同Gary哥哥都簽左名同握到手, 亦同佢地一齊影左相.

不過身為鄧健泓fans既我, 又點會滿足於一張三人合照呢,
所以決定等多一陣, 等佢簽晒之後再搵佢影多次相,

好開心終於可以同佢影相喇, 仲可以握多次手添呀,
不過最緊要既係可以同佢傾計!!!
我同佢講話我等緊佢既音樂架, 佢話多謝我, 佢既樂隊好快會有作品,
我再問佢幾時會出碟, 佢話宜家已經有三四首歌, 應該一兩個月就會有喎,
佢再多謝我支持, 就係咁我已經緊張到唔知再講咩.... 哈哈.
總之就係開心到痴Q左線啦, 偶像喎!!!
我想講佢真係笑得好靚仔呀!!!

~~~~~~~~~~~~~~~~~~~~~~~~~~~~