由於自己未去過台中, 又知道日月潭係比較隔涉,
所以一早報左船公司安排既Day Trip.
一來唔駛用腦, 二來唔駛驚會遲左番上船.
架船泊台中港時, 因為大風浪同埋水淺既關係, Delay左成個鐘先泊到.
上左岸之後, 就跟旅遊車去日月潭,
嘩頂坐左幾乎個半鐘先到喎, 去到個潭又真係好平平無奇...
水係好清好綠, 不過因為冇上去高既地方, 所以都睇唔到個潭既形狀,
而且我地已經o係海上航行左幾日, 遊湖對我黎講係冇感覺....
身為台灣人既我, 當然要o係青天白日滿地紅旗下影張相啦!
遊完湖之後, 就車左我地去文武廟.
由於時間緊迫, 所以逗留左20分鐘就走,
都好既, 因為個廟.... 咪就係一個廟, 又係冇乜特別, 台灣不嬲周圍都係廟架啦.
下一個行程就係去糕餅店買手信,
我地好犀利呀, 將帶去既台幣用到tup tup hum,
僅僅夠錢買太陽餅, 紫晶酥同埋鳳梨酥, 如果之前買多條腸仔食下都唔夠錢.
呢個時候, 緊張既時刻開始, 因為本身13:00 sharp要返上船既,
點知架車到12:50時, 我地都未見到碼頭既蹤影,
(架船咁大又咁高, 應該好遠都會望到)
到12:55, 終於見到架船喇, 不過係好好好好好好好好遠喎....!
死啦, 遲到既話, 架船唔等架喎 (不過我地因為係跟船公司安排既Day Trip, 應該會好D卦),
如果架船走左, 咁就真係PK喇, 因為passport係船公司Keep架嘛!
冇passport點返香港呀?!
卒之, 一輪飛車之下, 13:05去到上船既地方, 原來仲有另一架車都遲左.
真係好驚險呀!!!!
上晒船之後, 見到一個超大浪既情景:
點知一行出去, 成個人俾風吹到向後退, 背貼牆.....
跟住有個乘客叫我: 你快D企番入黎啦!!!
嘩真係估唔到突然間會咁大風浪.....
之後我地開始食lunch, 檯上既野食係俾風吹到跌晒落地下, 檯椅都係吹到走黎走去,
我都替D staff慘喇, 點執呀, 仲亂過打仗
(當時太狼狽, 自己都已經成手都係咖啡, 所以唔得閒影相)
隔左一陣, 隻船行番出大海之後, 開始大浪到隻船會晃,
由於依然係食野時間, 所以我地都仲o係餐廳, 本來少少晃都冇乜野,
點知有幾下晃既幅度之大, 係檯上面既杯杯碟碟會跣晒落地!!
手就得兩隻, 杯碟有四五隻, 按都按唔晒.....
Well, 就係因為咁, 我又搞到自己成手都係咖啡 (唔係成身, 已經好好彩)!
食完驚濤駭浪既一餐, 我地又開始o係船上搵節目.
今日有一個course係教人用紙整花花.
係由一個意大利導師教既, 過程真係好簡單, 整出黎都唔錯呀:
o係船上周圍行下shop下, 見到馬浚偉喎, 估唔到佢stay足咁多日,
好低調咁搵佢影張相 (返到香港又俾人笑我同暗星影相, 哈哈)
擾攘一陣, 睇下表演, 就差不多到dinner時間,
今晚dinner有主題架, 係意大利之夜,
所以D waiter/waitress都著晒所有意大利地圖既圍裙,
食食下仲俾Serve我地既Waiter邀請跳舞,
跳完1-on-1, 又帶我地跳住舞去餐廳台前,
原來有幾個"舞男"表演, 佢地都真係跳得好落力喎.
最搞笑既係, 佢地幾個跳完舞, 睇住佢地9秒9跑入廚房繼續捧餐!
船上既staff真係好all round~~!
~~~~~~~~~~~~~~~~~~~~~~~~~~~~~~~~
黎到郵輪假期第五日, 即係最後一日,
好乖咁爬起身睇最last一次船上的日出.
我地o個層房被安排o係好遲上岸, 所以我地好多時間o係甲板hea,
去餐廳拎D野食上去食呀, 攤抖下咁.
去到大約十二點, 終於到我地落船喇, 返到去海運大廈,
五日之旅圓滿結束了.
~~~~~~~~~~~~~~~~~~~~~~~~~~
後記:
第一日上番岸, 晏晝o個時都冇咩事,
到左夜晚, 個人唔知做咩開始左搖右擺...
一路擺到第二晚先冇事.... 果然會暈地浪.
~~~~~~~~~~~~~~~~~~~~~~~~~~
