攝影活動

買左相機之後第一次去睇波, 居然係去港會場. 

其實都冇乜心機睇波, 因為掛住試相機丫嘛, 原來影夜波真係好難影架, 

影左一大堆都冇乜邊張係滿意既....

 

 

其實入場之前, 去行左一陣花市, 當然又係影相既機會啦:

 

~~~~~~~~~~~~~~~~~~~~ 

今日約左Vivi, Carol同阿Per去茶果嶺影相, 我地去到都搵左一陣先搵到個古礦場, 

都要行少少山路, 去到o個度忽然間好似一個大花園咁喎:

 

影影下, 見到有TVB既crew行過, 原來佢地都去左o個度攞景拍古裝劇喎, 

仲見到原來做替身都幾搏, o係個懸崖度爬來爬去, 仲要著住D布鞋喎,

 

最搞笑係佢地有一度要丟兩個假人落懸崖, 點知其中一個kick左o係中間唔上唔落, 

最後佢地決定「棄屍」, 哈哈, 如果唔知見到個古裝女人long住o係度都幾驚.... 

之後我都再行上少少, 撞岩見到太陽落山, 如此美景真係可遇不可求!!

 

呢個景點完結之後, 我地去左鯉魚門食海鮮, 仲第一次用腳架影夜景添呀!

 

今日雖然病住咁出動, 不過都開心呀, 希望快D有下一次既影相活動!! 

~~~~~~~~~~~~~~~~~

咩都影

十幾日冇打日記喇.... 都唔知係因為懶, 定係因為生活太平淡. 

當日買相機既時間, 其中一個concern就係我會去球場影相, 

點知買左相機之後, 我一場波都未睇過..... 

咁都冇計, 唯有日日都帶住部機o係身, 咩都影下咁啦,

 

 

 

~~~~~~~~~~~~~~~~~~~~~~~~

Daphne成為AOS第二個結婚既成員喇, 真係好開心呀!!! 

睇下新娘子幾靚:

 

當晚Daphne太忙喇, 都冇機會同佢同Jason正正經經影番張相添, 

不過唔緊要, 我地有份見證佢地成為夫妻既一日已經夠啦.

 

~~~~~~~~~~~~~~~~~~~~~~~~

買相機

見carol o係annual dinner抽到部canon 550D (18-135mm)咁開心, 

我用左一個weekend時間去做資料搜集, 星期一返到公司, 又問D同事意見, 

本身都有D心郁想買單反架, 不過一來價錢問題, 二來都知自己會嫌大舊嫌重, end up擺o係屋企. 

經過一輪掙扎之後, 最後決定買canon powershot G12呢部prosumer機. 

lunchtime同左一抽同事去豐澤買機, carol同martin佢地好合作咁借D意俾個sales知我地係staff, 

點知真係送左好多野呀: 8gb卡, 相機袋, 一舊電, 大腳架, 洗鏡頭既set, 仲有mon貼. 

好期待可以同carol, vivi, thomas一齊去學影相呀!!!

 

~~~~~~~~~~~~~~~~~~~~~

和黃Annual Dinner 2011

今日又係一年一度, 萬眾期待既HWL Annual Dinner, 

首先有D好爆笑既野要分享, 話說今朝team meeting, BC煞有介事咁同Jennifer講: 今晚你去架呵? 

咁究竟點解BC咁咁樣問佢呢? 就係因為當大家都dress up既時候, 佢係同平時一樣(著得咁衰)架. 

一件橙色樽領針織衫(冇款+殘), 一條黑色殘西褲(唔知點解好闊), 一件寶藍色(校褸色)既長褸(怪cutting+皺爆), 

當然唔少得既係一頭亂髮同埋倉白唔化妝既面孔(唔帶con).... 

開會之前, 我, Carol同Celia先o係Breakout area撞到BC, BC先話我地著得咁靚囉. 

OK講番重點先 - 令人期待既table prize. 

我今年又係抽到百佳$1,300 coupon呀, 勁開心呀!!

 

第五年參加和黃Annual Dinner, 抽到三次百佳, 一次豐澤, 一次屈臣氏. 次次都抽到coupon真係好lucky. 

不過講到lucky, 點都唔夠Carol lucky啦, 話說Compass開埠以來都冇人中過grand lucky draw, 

呢個宿命今年終於打破左喇, Carol由霍建寧手上抽到canon 550D !!!! 

宣佈o個一刻, 大家都尖叫勁high, Carol仲好似好難以置信咁添, 

成個場有1,600個人, 得30份禮物咋, 仲有D係衰野(eg 三日兩夜瀋陽sheraton酒店住宿, 唔包機票架喎) 

我覺得真係好好好彩呀, 雖然唔係我中, 不過我都好開心!!!

 

 

~~~~~~~~~~~~~~~~~~~~~~~~~

2010 大事回顧

2010飛快地過左, 時間過得實在太快.... 咁又一年. 

睇下2010發生左D咩事先:

1.     二月同匙匙去左bangkok自由行, 五日四夜嘆爆之旅真係好relaxing.

2.     新球季開始之後, 要打游擊咁去唔同既球場睇波, 港九新界既甲組場都去晒!!

3.     服侍左我地屋企十幾年既雪櫃壽終正寢,唔知對上一次有新家具係幾時囉... (其實雪櫃算唔算家具架呢?)

4.     o係工聯會上左十二堂既掌相學, 岩岩學完o個排成日都聚精會神咁睇人地既手掌同手指, 企圖解讀人地既內心世界.

5.     睇左三個演唱會, 分別係Eason, 羅志祥舞法舞天3D立體世界巡迴演唱會, 仲有五月天, 亦因為呢個concert而愛上左五月天.

6.     四年一次既世界盃, 愛隊意大利分組賽出局, 我哭了; 另一隊愛隊西班牙捧盃, 開心爆.

7.     咁大個女第一次生牙瘡, 牙肉又腫又痛左成個星期....

8.     上年東亞運動會, 香港隊比賽時我上左蘋果A1, 更厲害既係我成為左"香港2009"呢本政府刊物既封面!

9.     電左個卷髮, 女既讚好, 男既唔like, 證明D仔都係鍾意周慧敏.

10.   睇左廿幾年大牛電視, 鍾意都踏出左一大步, 換左部LCD TV, 可以睇高清台喇!!

11.   第一次跟左屋企人返鄉下(雲浮)

12.   咁大個女第一次淚管閉塞, 隻右眼紅到好似會爆咁呀.

13.   睇波咁多年, 都未試過睇十二碼到射第十一輪 (當日係銀牌盃流浪vs傑志, 流浪憑總比數12:11贏左)

14.   第二次睇黃子華棟篤笑, 依然係正, 才子即係才子.

15.   十二月同vivi一齊去越南, 一齊慶生, 第一次生日去旅行呀!

16.   最重要最重要, 下定決心要做番自己, 過自己既生活, 做自己想做既事. 知道呢個世界其實好大, 呢段時間我忽略左好多人好多事, 我要追番D時間.

~~~~~~~~~~~~~~~~~~~~~~~ 

2010年究竟有冇比2009年過得好呢? 我覺得有既. 

唔係話開心定唔開心既問題, 而係我終於搵番自己, 

放輕鬆平常心, 開始留意番身邊美好既人同事. 

工作方面, 都係麻麻地啦, 唔順心就梗架喇, 同D人根本work唔到既, 

都唔知我俾佢地激死先, 定佢地俾我激死先, 不過都好彩仲有一班好同事lunch time時減減壓. 

至於2011年既展望..... 希望工作唔好咁多阻滯啦, 身體要健康, 唔好再成日病. 

愛情方面呢.... 過左D充滿憧憬既年紀啦, 尤其係經過今年之後, 

無論付出幾多, 你幾堅持都好, 事情既發展都唔會係你預料之內, 人心就更加難測. 

順其自然啦, 最緊要過得開心. 

~~~~~~~~~~~~~~~~~~~~~~~