配眼鏡

尋日約左匙匙, Esther同Sandra出黎食buffer lunch, 今次去左朗豪酒店.
我不嬲都唔係極度鍾情食buffer, 因為本身唔係好食蠔, 食量又唔係勁,
不過作為一個慢慢坐下傾計既地方, 就好 fit.
呢度最吸引既真係甜品, 都算係食咁多buffet之中最多選擇既:

最好就係樣樣都的骰, 一兩啖就一件, 可以食多幾款,
不過雪糕既選擇就不多.
埋單好似每人$226(Visa Platinum有85折), 都acceptable.
有一樣野真係要寫低, 就係我地食左一件綠茶咩咩蛋糕之後, 佢地既評語如下:

Esther: 其實唔食都得
匙: 我想lur出黎喎
Sandra: 又未至於要lur既, 不過想快D吞左佢囉.
俾佢地講完, 都真係可以唔駛食, 雖然我最後都試左少少.....

食完野, 我地去左唱K, 完全就係小豬演唱會一樣, 哈哈哈哈!!!!
又有一樣野想寫低, 話說Esther個妹去美國旅行,
Esther媽媽叫佢買塊砧板返黎喎...... 嘩真係笑爆咀呀, 唔知阿妹最後會唔會買呢?
因為聽聞Esther媽媽好權威, 仲要俾埋卡片佢, 想話搵唔到都唔得...
~~~~~~~~~~~~~~~~~~~~~~~~
今日同屋企人飲完茶, 就同爸爸去配過副老花鏡,
點知我等緊佢驗眼之際, 我自己就睇中左ANNA SUI既鏡框...
(其實上次同媽媽配老花鏡既時候, 已經試左幾副架喇, 不過唔捨得買)
今次sales連display o係鋪面既框都拎晒俾我試戴,
唉, 就係咁樣出事啦...... 又破財,
不過呢副係我第一次branded既眼鏡(唔計太陽眼鏡), like爆!

我諗黎緊我會少D戴con, 多D就四眼妹, 哈哈!
仲有, 視光師話我近視淺左喎 @.@ 乜近視都變淺架咩?
~~~~~~~~~~~~~~~~~~~~~~~~~~

台灣trip confirmed

話說今年係爸媽結婚30周年, 做女既我當然要同佢地大事慶祝啦,
所以決定我做東, 請佢地去旅行, 而地點就係我爸既鄉下: 台灣.
夾好放假日子, 立刻book機票同酒店, 經過一輪格價同意見搜集之後,
就上priceline book好機票同捷絲旅酒店, 台證亦都同一日上網做埋,
萬事俱備, 只欠行程, 懶人如我相信都唔會咁快plan好.... 哈哈.
~~~~~~~~~~~~~~~~~~~~~
屋企缸魚已經養左一個星期, 除左頭兩日死左兩仔之外, 另外四條都算健康.
今日就再到金魚街, 買D friend陪下佢地.
行勻成條金魚街, 最後決定買紅鼻剪刀魚x10.
佢地真係超級活躍同colorful呀, 配合埋本身4條日光燈魚, 真係熱鬧非常

~~~~~~~~~~~~~~~~~~~~~

太平館 + 魚魚

快樂既時光過得特別快,
就o係honeymoon既最後一日(星期五), 我地一行12位同事一齊去左權發食lunch,
朱嘉聰都有黎呀, 不過其實星期一先同佢食完....
叫左九個餸, 仲有湯再加野飲白飯, 每人都係$60!! 抵!!

~~~~~~~~~~~~~~~~~~~~~~~~~~
今日晏晝同左爸媽去太平館食tea, 因為聽carol同celia講呢度既tea比正餐平好多.
去到我地叫左招牌既乾炒牛河同埋兩人份既梳乎厘,
牛河有鑊氣, 一條條都炒開晒冇黏住, 而且乾身碟底冇油, 唔錯唔錯.
梳乎厘就一早知係好大份既, 不過一黎到真係嚇一嚇!!!
食落冇想像中咁"一陣風", 兩個人應該食唔晒.
我本身唔係好特別鍾意食梳乎厘, 不過都覺得好好食, 仲勁飽!
埋單$173, 真係幾貴, 不過一次半次, 叫做試過啦.

~~~~~~~~~~~~~~~~~~~~~~~~~~~
食完tea, 就去左金魚街.
今日既target係一個魚缸, 濾水器, 氣bump, 當然仲有魚啦,
本身諗住唔買套缸, 自己組裝既, 不過睇睇下, 都係決定買套缸啦,
一個AA牌套缸, 13", 連頂濾(包埋生物環)同埋燈, 都係$230.
而因為個頂濾本身都會有水流同氣泡, 所以可以不用氣bump都夠氧氣.
一次過買埋D林林審審既工具, 搞掂, 可以去揀魚了.
本身想買番我第一次養, 一個weekend都過唔到既Q版波子既,
不過由於係新缸, 我怕佢地又好快死, 所以都係決定買D再細D既燈魚先,
養順左, D水真係冇問題先買番Q版波子.
返到屋企, 全部野都係洗得乾乾淨淨, 最辛苦係洗放o係缸底既石春, 洗極都有沙!
(D石春係20年前屋企缸大魚用落既, 估唔到20年後會再養魚)
洗晒D野, 落埋新水穩定劑, 就可以放魚喇!
呢次我買既叫做日光燈魚, 買左返黎先search到人地話唔係咁易養喎,
都冇辨法啦, 希望佢地可以快高長大啦.
聽日等我去買番D裝飾, 一來個缸冇咁吉, 二來呢D小魚都須要地方匿下.

~~~~~~~~~~~~~~~~~~~~~~~~~