那些年我們一起去的旺角場

相隔兩年, 重踏舊地, 心情激動得唔知點形容.
由我踏入花墟道, 行向球場入口方向開始, 我已經心跳加速,
好多好多回憶浮晒出黎, 當年曾經o係呢條路做過幾多厚面皮的事....
一路向前行, 去到球場入口, 好靚既box office....
買飛入場, 見到好大好新好靚既看台, 青綠既草地, 呢個moment我真係有D眼紅紅.

呢個就係我度過左十幾年既青春歲月既地方, 我終於都返黎呢度!!

今日既比賽係邊兩隊唔重要, 係盃賽定係聯賽都唔重要,

因為以呢場波既戲碼, 500人入場係正常, 不過今日係有4500人入場,

可想而知大家都係為旺角場而入場!!

對呢個球場既感情, 比任何地方/母校都要強烈得多.

兩年前佢要關閉重建, 覺得黎緊兩年都要做遊牧民族睇波, 係好難想像,

兩年過去, 遊牧民族既生活已經慣左, 不過始終都係好期望旺角場重開既呢一日!

今日天氣好好, 陽光普照, 不過宜家唔怕喇, 令人望穿秋水既上蓋已經起好:

坐左4500人既旺角場, 以前一定坐得好唔舒服,

對腳痴住前面個人既pat pat, 背脊又俾後面條友個膝頭頂住....

不過宜家唔怕喇, 獨立座位, 你掂我唔到, 我掂你唔到.

最good既係雖然看台升高左, 不過反而覺得同球場距離更近,

因為坐頭幾行都唔會俾後備席遮擋視線.

連個toilet都升級, 以前得三格, 冇抽氣又成日都冇水, 宜家靚晒啦:

下一場比賽係星期五, 公民對大埔, 一定要早D入場坐中間, 今日坐得比較邊邊, 氣氛爭少少.

呢張相我好滿意:

~~~~~~~~~~~~~~~~~~~~~~~~~~~~~~