跑步

荒廢左詠春之後, 呢期既運動就係跑步,
唔知痴起邊條筋忽然想加入跑步既行列, 上兩個禮拜走去買左對跑鞋,
上星期一就相約Emily去跑馬地一齊跑.....
呢個地方, 細個去搵雞仔就去得多, 真係去做運動都係第一次.
少做運動的我, 第一次跑步都幾辛苦, 跑幾步已經喘氣,
行多過跑既情況下, 43分鐘"跑"左4.75公里, 之後第二,三日對腳超酸痛囉,
經此一次, 深深覺得跑到PK先burn幾百卡路里, 食野真係要小心D!
隔左一個星期, 岩岩星期一再跑, 今次明顯冇上次咁辛苦,
跑下行下, 最後39分鐘跑左6.34公里, 今日星期三, 對腳已經冇乜肌肉痛喇.
我地約埋阿Wing聽日再跑, 真係開心, 好熱鬧!!

11年11月11日

岩岩過左既星期五係11年11月11日, 我地一班同事去飲茶,
本來真係可以11個人架, 不過louisa臨時黎唔到, 唯有計埋carol肚入面o個個先夠11個人, 哈哈.

今日約左sandra, tracy, esther, linus去整蛋糕, 點知linus突然間放唔到假,
最後叫左阿軒頂上, 唔好浪費嘛.
今次我地整既係榛子慕思蛋糕, 係凍餅, 唔駛焗既,
compare with上次既藍莓芝士焗餅, 我就覺得上次好玩同好食D,
因為今次基本上都係將D野撈埋拎去雪就得, 冇乜variation可言,
如果要焗, 都起碼可以期待下D色金唔金黃呀something like that....
anyway, 都係志在玩下又有得食咁既, 所以都OK, 本人認為都整得幾靚丫, 哈哈!

下次再去, 真係要整D要焗既, 話晒o個度D爐Pro D丫嘛, 冇理由整D屋企都整到既野.
~~~~~~~~~~~~~~~~~~~~~

南寧四日三夜

過左成個星期先寫番南寧之旅, 可想而知假期後呢幾日係何其身心疲累.
星期四出發, 坐左九個幾鐘頭車去廣西南寧市 (Already excluded the meal and toilet time),
第二日又搭左四五個鐘頭車, 先去到位於崇左市, 中越邊界既德天瀑布.
車程雖然係遠, 不過一見到個境, 真係咩心情都返晒黎!!
呢世女都未真正見過瀑布, 冇帶腳架既情況下狂影相, 石膏手真係非一日可以練成.

睇完瀑布, 就去左中越街睇下D so-called越南特產,
最緊要當然要o係兩國既邊界位置影下相啦:

睇完瀑布, 下一個景點就係黑水河,
由於天氣算唔錯, 所以影到D相都OK,

而且我地一團四十幾人分左兩條船, 我地係坐第一條,
所以影到水面波平如鏡既倒影, 而跟尾o個條就會影到水面有船行過既波浪, 倒影冇咁靚.

第三日既行程就係搭左唔知幾多鐘頭車去北海銀灘,
呢度D沙真係好幼, 同埋長到見唔到盡頭, 地下仲有超多蟹仔!! 好cute.
如果天氣夠陽光普照, 應該會更靚.
我地見到一個小妹妹好努力咁挖挖挖, 幾乎自己個頭都伸埋入D沙入面, 超可愛!!

夜晚我地出左去食宵夜, 我相信vivi, carol同thomas一定好鍾意食,
就係有串燒同埋啤酒, 蠔仔粥同小炒都有.

D燒蠔真係正爆呀, RMB3一隻咋! 飲飽食醉就返酒店喇.
到第四日, 最後一個景點就係湛江市既湖光岩,
話說呢度既世界第二大既瑪珥湖, 應該係由火山口形成既,
我地坐小火車圍住個湖行一圈係要七公里呀! 可想而知有幾大!

遊埋湖光岩就起程返深圳喇, 又係搭左唔知幾多個鐘頭車咁啦,
累到爆竹第二日就要返工...
~~~~~~~~~~~~~~~~~~~~~~~~~~