我的Ukulele新一頁

上完三個季既Ukulele課程之後, 暫時今季未有再高一級既開班,
所有宜家星期六唔駛上堂, 時間好似多左好多咁.
雖然冇上堂, 不過都唔係放低支結他就算架,
上個月o係柏斯琴行見到支Ukulele愛不釋手, 諗左幾日之後決定要買!
點知巴閉到要訂喎, 好啦訂左之後大約三四日有得攞.
支結他一到手, 實在係開心到爆, 因為真係好型呀!!!
呢支結他本身有自己既共鳴箱, 所以唔插電都會有聲既,
不過由於琴身薄, 就咁彈就會比較細聲, 而且D聲反而冇我本身木o個支咁好聽.
於是就要去買個音箱, 琴行一般最細size(即係大過一個麻將箱咁)都要$500-$600,
我呢D初學者試都未試過, 梗係唔捨得啦,
而且話就話細size, 實質都要搵地方擺嘛....
所以轉戰淘寶, 原來有D portable同埋再細D架喎,
岩晒我啦, 又平又細, 玩下之嘛.
再o係琴行配番條線就用得啦!!!!

插左電之後真係powerful左好多呀!!!
聲可以超大, 仲可以揀清聲or拆聲.
不過呢個Amp可能太cheap既關係, 拆聲都唔係好拆, 哈哈.
最開心係可以玩D rock歌, 之但係又有另一個問題...
你曾幾何時見過人地彈Rock野會坐o係度彈既呢?
點解唔企o係度彈? 因為支結他都幾重身, 唔似支木既可以用右前臂輕力都夾得穩,
如果我右手唔夠力, 左手又要轉chord唔可以「揸死」,
唯有坐低放o係大脾上面彈啦.....
結論就係: 冇背帶既話拎唔掂, 要配番條帶.
不過呢個唔urgent既, 所以都未諗想買咩款.
~~~~~~~~~~~~~~~~~~~~~
拎住支結他, 最鍾意就梗係彈五月天啦,
網上面其實好多好多resources, 不過有D得中間冇前奏/間奏,
一係就個前奏/間奏難到飛天,
所以通常搵到個譜返黎之後, 都要彈幾次, 睇下係咪真係順or有冇chord要改.
如果少改就直接改圖, 大改就要自己由頭打番一次出黎,
覺得第時要睇番都會好睇D.
初學o個最like彈「溫柔」、「擁抱」、「戀愛ING」,
呢期就鍾意彈「我不願讓你一個人」、「如煙」、「突然好想你」,
新搵到既就有「步步」同埋「傷心的人別聽慢歌」.
岩岩搵到個彈-able既「離開地球表面」, 不過要執執先.
除左五月天, 其實都企圖搵小豬既歌譜.
一來少, 二來佢D歌唔係好岩用結他彈, 所以放棄左.
反而GD同Bigbang都有, That XX, Blue, Fantastic Baby.... 都搵到.
問題係個譜好難對落歌詞度, 韓文唔識睇, 而且Hip Pop既好似難D咁.
至於之前上堂學o個D歌... 已經拎都冇拎過出黎練啦.
~~~~~~~~~~~~~~~~~~~~~~~
打到呢D, 好手痕想執執「離開地球表面」個譜... 哈哈
~~~~~~~~~~~~~~~~~~~~~~~

小鬼Shining on the Stage!

認識小鬼係由around 2006年睇開始睇「娛樂百分百」.
當時覺得小豬帶住呢個後生仔都幾可愛, 成日都傻下傻下.
好似好想唱歌, 但係又冇唱片公司幫佢發片, 唱來唱去都係丸子首關東煮.
後來睇住佢一路有自信, 一路進步,
出左兩張album我都有買, 到上年12月佢concert竟然開到黎香港!
當時覺得應該十年都唔逢一潤, 佢呢D又唔係紅, 都唔知會唔會只此一次,
所以死都拉陳慧敏同我去睇.
岩岩完左既新城國語力頒獎禮2013, 咁好彩有飛, 梗係搏會有小鬼啦.
哈又真係俾我搏到喎, 見佢拎獎拎完一個又一個(雖然明知新城D獎唔值錢),
真係好戥佢開心呀!!

頒獎禮慶功後, 佢post左一段感言, 其中一句係話:
努力是什麼？
我說的努力！
是做自己不會的、不拿手的！
狂做自己愛的會的爽的！
不構成努力！
睇完之後, 覺得有D提醒左自己既感覺.
知道自己有時遇到困難既野會選擇逃避,
但係咁樣就永遠都唔會進步!!!
~~~~~~~~~~~~~~~~~~~~~

是你... 真的是你.... 大衛施華!!!! (下集)

話說初賽日施華冇落場, 搞到勁失望....
心諗miss左今次, 都唔知仲有冇機會可以現場睇佢比賽,
所以當晚好des咁o係Facebook雪地裸求決賽日門票....
第二朝起身,  有個friend(嚴格黎講我係唔識佢的, 只係香港球迷以前add落我)PM我,
佢話佢有個friend有$600飛一張, 可以原價放俾我.
仲影埋張飛俾我睇, 係主層109區!!
如果施華踢正選, 佢踢左中場, 109區對落正正就會係佢活躍範圍!!!
我考慮左一陣, 一來加埋呢$600, 我total就會駛左$1100 for呢個球賽,
二來雖然我唔係未試過一個人睇波, 但係呢D大野就真係未試過一條友去.
不過咁, 由於我太愛施華, 又唔想錯過呢個once a lifetime既機會,
所以決定同佢買!!!!
~~~~~~~~~~~~~~~~~~~~~
比賽當日銅鑼灣交收, 6:00pm開頭場, 8:30pm開尾場, 佢竟然約我4:30pm...
算啦, 拎左飛之後行下街先上去.
逛到around 5:45pm就入場, 一路上去多人到嘔, 人群中真係好Q熱.
入到去之後冇即刻埋位, 因為上次冇機會行下D紀念品攤位,
行左一圈, 四個球會既攤位都冇收鑊
(廢話, 除左曼城, 其他3間冇可能會買. 而曼城如果係like既, 一早上網買左啦)
坐低左冇耐就開波, 熱刺vs南華.
其實亦唔係太投入, 因為again實力太懸殊喇.
主要都係熟習下用thomas部相機先, 因為未試過拎大機入球場.
~~~~~~~~~~~~~~~~~~~~~~
頭場完左之後, 曼城球員出黎熱身喇!!!!
施華o係度呀, 仲要睇到佢係同正選一齊熱身, yeah yeah yeah x 10000
即刻走落去痴左線咁喪影.

終於到開波, 大會宣佈兩隊出場名單.
「曼城正選球員.... 21號大衛施華 No. 21 David Silva」
全場哄動, 估唔到佢o係香港都幾紅喎.

一如所料, 佢活躍範圍o係正我前面, 所以部相機係"chap"足45分鐘咁滯,
梗係啦, 我估佢一定只係踢上半場, 因為好明顯狀態未係好好.
話雖如此, 佢D扭波同passing依然係world class.
尤其曼城今場既對手係新特蘭, 大家都係英超球隊,
實力接近D, 球賽都緊湊D, 球員都冇交行貨.
而且可以咁近距離睇到真人表演, 夫復何求?!
踢波同埋身體碰撞既"砰砰"聲, 聽得一清二楚.

踢到上半場中段又開始落大雨, 一個二個變泥鴨,
要我施華踢埋D咁既薯仔田, 真係太過份.

上半場完, 曼城帶住一球返入更衣室.
~~~~~~~~~~~~~~~~~~~~~~
到下半場, 已經見唔到施華既蹤影, 因為佢已經被拿斯利入替.
一路keep住1:0戰果到完場.
估唔到賽會有放煙花環節, o係大球場睇煙花都係第一次.

~~~~~~~~~~~~~~~~~~~~~~
我坐o個區咁岩係曼城球迷會區, 大班鬼佬唱晒歌咁好好氣氛,
From我經驗, 咁大堆遠道而來既球迷o係度,
D球員領完獎, 一定會過黎謝幕, 所以我死都唔走住.
果然不出我所料, 佢地行晒過黎同我地揮手呀!!!

~~~~~~~~~~~~~~~~~~~~~~
雖然施華只係踢左半場, 不過45分鐘都係盡力踢好波,
我覺得無比既幸福同滿足,
呢$1,100, 俾得好暢快!!!!
~~~~~~~~~~~~~~~~~~~~~~

是你... 真的是你.... 大衛施華!!!! (上集)

由公佈英超唔知咩咩挑戰賽既參賽隊伍開始, 已經處於極度期待既狀態,
因為有我既愛隊曼城!!! 印象中曼城應該咁耐以來都未黎過香港!
一直都好留意賣飛既日期, 到公售當日, 我同thomas打爆N部電話都打唔通,
以為要錯失見到大衛施華既機會....
點知過左幾日, 再上網竟然仲有初賽日既飛!!!
睇唔到決賽, 初賽都殺!!
精挑細選再加上一場辯論, 終於決定買最貴飛($500)坐主層.
另一個課題就係坐邊區, 好辛苦買到103區, 即係近更衣室入口.
因為我擺明要睇星, 梗係要好清楚佢地行出行入既路線啦.
~~~~~~~~~~~~~~~~~~~
千等萬等, 踏入七月, 曼城開始asia tour去唔同地方踢熱身賽.
但就硬係見唔到大衛施華既報導, 究竟佢有冇join到個tour架?
又等到23/7, 知道施華已經飛緊過黎香港, 成個心都定晒.
兼開始倒數仲有幾個多鐘頭可以見到佢喇....
24/7比賽日黎喇, 一早起身, 正想打個FB status話仲有12個鐘就見到大衛施華,
點知呢個時候俾我睇到段新聞, 話佢同埋阿古路因為剛剛歸隊同狀態不足,
所以講明唔會落場....
Holy Shit WTF! 呢個moment我真係眼氾淚光....
點解... 點解我等左咁耐既今日, 施華竟然唔會落場?
全日既心情跌落谷底....
放工入到球場, 心情其實都有D興奮既, 冇施華, 都仲有拿斯利...(退而求其次)
頭場熱刺vs新特蘭, 踢到下半場, 我對眼基本上都冇望球賽,
因為我要望實更衣室個出口, 睇下曼城D球員幾時出黎.
第一個伸個頭出黎既係祖赫特, 當堂尖叫左出黎!!
即刻衝落去第一行有利位置影相啦, 球員陸陸續續出黎熱身,

等左成半個鐘, 連職員都出晒黎, 點解都唔見施華出黎既?
唔落場o者, 唔係連球場都唔黎卦? 我expect佢點都會出黎行行企企既.
等了又等, 都係冇人再出黎, 就唯有轉身行番上去個位.
一返埋位, 拎番個頭望落去, 就俾我見到施華個背脊!!!

OMG!!!!!! 佢有黎呀!!!!! 但係做咩我一走佢就出黎呀!?!?!
Anyway, 最緊要佢個人有到, 一陣間都仲有機會的.
到左半場, 佢都要跟大隊返更衣室, 所以我提早行左落去捕佢.
今次俾我見到佢喇, 好近呀!!!!!

見到偶像既心情好難形容, 佢呢D唔同五月天/小豬佢地一兩年會黎一次,
今次見唔到, 真係唔知仲有冇咁既機會!
咁由於施華冇份踢, 所以比賽期間我主要都係睇拿斯利:

場波基本上係太懸殊, 曼城都係死猜, 有位就去, 冇位就慢慢再猜,
所以都講唔上精彩, 不過以我睇星既心態, 係好OK, 因為真係好近.
(要睇波既睇電視仲好睇, 俾咁多錢入場就梗係睇星啦)
~~~~~~~~~~~~~~~~~~~~~~~~~

盛夏台北行

六月咁熱辣辣既天氣竟然去旅行.... 不過去台灣我當然覺得OK啦.
搭0810起飛既機, online check-in又冇位....搞到要撘五點幾既N23入機場.
今次同Vivi係搭唔同既機去, 我係早15分鐘飛的,
點知架機又遲, 所以我同Vivi可以o係台北機場Immigration撞到, 哈哈.
一落機攞完行李, 第一時間去買電話卡,
本身想買台灣大哥大, 不過條龍實在係unacceptable地長!!!
所以轉去買中華電訊, 3日無限上網再加好似係NT$100通話, 都OK岩用.
買完電話卡, 就會合番一早book好既的士, 直接去烏來三好米溫泉酒店.
車程都好似搭左個半鐘..... 勁隔涉既地方, 不過環境唔錯.

由於酒店o係半山, 要落去行街食野一定要搭車,
而酒店又好好咁包我地一次來回, 即叫即有車o個隻.
大概5-10分鐘車, 就落到去烏來老街

其實條條老街都係咁上下, 呢到會有D原住民既特產咁.
我地食D野, 行左一陣就去搭小火車.

上到去有鳥來瀑布, 水比較少, 不過就好高.

瀑布上面仲有一個叫做雲仙樂園既地方, 係有D民族表演.
不過要搭吊車上去, 我見到就怕怕, Vivi自己上去.
我就留o係下面影下相咁.

聽Vivi講, 去上200級樓梯, 仲收NT$220一個人, 好彩我冇上.
因為俾左錢去到, 又冇理由唔上埋去睇下有咩表演嘛....
睇完瀑布, 我地冇搭小火車落山, 反而選擇左行落去, 當睇下風景.
之後睇埋個原住民博物館, 都冇咩好做就返酒店沖涼 (太熱喇, 想死).
酒店係包埋晚餐, 我地一個叫左雞腿, 一個叫左豬排.
好住家既感覺, 勁飽都食唔晒.

食完野就返房休息同埋浸溫泉喇.
~~~~~~~~~~~~~~~~~~~~~~~~
第二日起身, 酒店有早餐,
不過個大堂因為裝修既關係, 冇冷氣, 所以好快食完就返房.
Hea到around 11:00, 就check-out同埋搭番的士出去,
今次亦係直接去到西門町既Just Sleep酒店.
放低行李, 就搵地方醫肚先, 去左一間冇餐牌, 又唔知要幾錢埋單既日本餐廳.

老闆娘問我地有冇野唔食, 牛羊都食嗎? 我地話左都食.
點知世界既野真係好難預料.... 邊個估到日式料理會有橙?!

橙煮蠔我都係第一次聽.... 哈哈哈哈, 當然我係吞埋Vivi o個份啦.
第二道正係個蟹鍋, 由頭食到尾, 最正.

其他野係都好豐富, total有10道菜:

埋單, NT$3980兩個人, 都有D肉赤,
不過未試過咁樣食野, 叫做豪一次啦.
食完野, 就行去艋舺龍山寺, o個度有個地方叫做剝皮寮,
好多電影包括艋舺都o係入面取景.

行完剝皮寮, 我地都有入去龍山去行個圈, 香火好鼎盛.
之後就搭捷運去中山站.
行左幾間boutique之後, 突然間落大雨, 狂風雷暴!!!
我地等左有半個鐘, 雨都冇細過.... 卒之冒雨搵間cafe坐住等.
基本上我地係一見到第一間就衝入去, 因為太大雨喇, 唔容許再揀.
呢間cafe個名好勁, 叫做天虹之橋, 我地叫左個花茶(因為夠襟飲),

就係咁坐左個幾鐘, 終於都叫細雨番D, 可以再起行.
附近再行左一陣, 就番去西門町站, 去西門紅樓睇下個市集.

都係D手作仔小鋪咁, 唔算好特別.
之後依照我地既計劃, 係去錢櫃唱K, 不過呢個時段(8:00pm)好貴,
收廂房價, 兩個人真係勁唔抵... 所以決定去食晚飯, 食完10:30pm返黎就抵唱好多.
o係西門町兜好耐, 都唔知食咩好, 最後決定食番我次次都去既鍋爸,
貪佢可以坐耐D又唔貴.
坐到咁上下就返去錢櫃, 好快有房.
10:30pm可以唱到06:00, 如果冇記錯係唔駛NT$400一個人!
唱唱下, 我地玩佢個評分, 唱極都係七十幾分, 好無聊, 哈哈.
當然我地都冇唱到06:00咁誇, 未到02:00就走, 到上床訓都三四點喇.
~~~~~~~~~~~~~~~~~~~~~~~
第三日, 我地兩個都冇校鬧鐘, 又好好訓....
搞到10:45有人敲門入黎執房囉..... 呢個時候我地先起身,
蝕左個酒店早餐, 所以第一站就係去StayReal Cafe.
講左幾年, 終於都去到呢度喇, 係o係忠孝敦化站出黎行5分鐘到.
佢地都應該岩岩開門, 所以有D cake都未放出黎, 亦都得兩檯客.
野食未黎, 又趁冇乜人, 就周圍影下相, cafe既佈置好精緻.

影完就有野食喇, 之前都聽陳慧敏講呢度既鬆餅係必點.
我點左楓糖奶油鬆餅(NT$160)果然係名不虛傳, 先講賣相已經好吸引,
好似一片片花瓣咁砌出黎, 食起上黎都好方便.

飲品就點左Iced Mocha, 你睇D朱古力醬都有pattern架!

Vivi點左來Double cheese cake同埋Latte, 都一樣好吸引.

食飽就o係附近行街, 本來打算搭兩站捷運去忠孝新生站,
咁我地落留去忠孝敦化站, 見到有條地下街, 就行下睇下,
行行下就發覺幾乎行到忠孝復興站, 既然係咁, 不如行埋落去啦,
見橫掂有冷氣, 計埋去月台上上落落, 可能都唔爭幾.
所以就決定再行多個站去忠孝新生, 點知....
忠孝復興同忠孝新生中間, 係冇地下街的, 即係要上番地面.
都算喇.... 點知呢個站係超遠囉, 應該行左起碼20分鐘.
幾經辛苦, 身水身汗終於去到華山1914文創園區.

由於太累太熱, 我地搵間餐廳坐一陣.
一打算走, 又落雨喎, 好彩今次唔係好大, 等多一陣都停番.
周圍行下, 都係D藝術野, 又有D手作仔鋪頭, 餐廳咁.
行晒之後, 就搭捷運去淡水睇日落.
本來見天氣麻麻又厚雲, 對個日落景都冇乜期望,
行左淡水老街, 買左薑茶之後, 就坐低等日落.
王天不負有心, 呢個時間個天色又幾靚喎!

影完相, 我地就搭番捷運走, 下一站就係師大夜市.
長途車就係爭取休息既時候....
去到公館站, 搵到間好平民既"餐廳"食魯肉飯.
一開始食, 就有好大隻曱甴衝住我而黎, 嚇到我彈起,
所以我地用最快既速度食完即走!!!
唔知係咪星期一既關係, 夜市唔太多人, 好多檔口亦冇開,
我亦好記得師大夜市係冇乜地方可以坐的,
所以就決定返酒店放低D野再算.
一返到酒店, 九點幾, 我已經累到不行, 所以投降唔再落去喇,
Vivi依然戰鬥力旺盛, 佢自己一個人落去搵野食, 仲行到去台北車站....
只可以寫個服字.
~~~~~~~~~~~~~~~~~~~~~~~~~
第四日, 可能前一晚比較早訓既關係(應該十二點到...),
八點幾就自然醒左, 我自己落去食酒店早餐,
都唔係食得好飽, 因為我地要去上引水產.
由酒店搭的士過去魚市場, 都係NT$200到, 都幾快.

11:30去到, 當時叫飛叫到16號, 我地就派到47號, 等31個....
o個度其實係似City Super咁, 有好多pack好晒既海鮮魚生可以買走即食.

D三文魚又平又靚:

又可以選擇買生勾勾既海鮮, D蟹好大隻呀!!!

除左魚生壽司海鮮之外, 另一邊仲有燒烤區, 不過太熱冇乜人幫襯.

等左一個鐘, 到我地入去喇,
呢度食野係企o係度食的, 等左一個鐘, 再食一個鐘, 其實都幾累.

我地點左個立嶼套餐, 有沙律, 刺身, 壽司, 湯, 蟹腳

仲另外點左馬糞海膽手卷同鮑魚片刺身.

都OK飽, 幾錢唔記得, 不過係抵食既.
食完野, 附近都冇咩好做, 就搭的士返西門町, 去最後一個景點 - Stage Cafe.
Stage Cafe係o係一個叫Neo West既商場入面, 唔係特登搵, 係唔會見到.
門口都好Stage既style, 同StayReal係完全唔同路線.

客唔係好多, 我地都係點左咖啡就算.
一等就等20分鐘先黎....
我杯香蕉拿鐵一黎到我係呆左.... 做咩咁樣衰既?
零拉花, 又冇Stage Logo, 衰到我相都冇影....
我自己搞兩下之後, 一致認為仲好過佢黎o個時:

賣相唔靚都算, 香蕉拿鐵冇香蕉味既?!!
Vivi點左招牌既Stage Cafe, 都起碼用番Stage既咖啡杯同埋有Logo.

不過聽佢講, 飲落都係一般.
唉, 勁失望...... 掛得自己品牌個名, 要注意質數呀!!!
好啦, 飲完咖啡, 同Vivi去買好得意既俄羅斯軟糖, 就返酒店拎番行李去機場.
我地搭19:40既機, 大約18:00去到機場.
點知..... 我地班機delay到21:10喎....
airline派左我地一人一張NT$200既餐券, 就去左food court醫肚.
食埋野都係七點幾, o係機場買埋太陽餅同埋綠豆餅, 行左陣就去候機室等.
都估到佢21:10唔會飛到, 再遲左廿幾分鐘先走得.
返到香港都十一點幾, 拎埋行李上巴士已經23:45.
一點鐘返到屋企, 好彩拎多日假, 唔駛早起.
~~~~~~~~~~~~~~~~~~~