轉行補鞋

一路都俾阿媽哦左好耐, 就係叫我執下間房D衫同鞋,

因為實在係太多太亂喇, 個櫃都塞唔到所以放到周圍都係....

由於最近買左好多衫, 而今日又o係淘寶買左四對鞋既關係,

擔心返到黎真係冇位擺, 所以的起心肝, 丟野!!

浩大既工程, 就係由搬晒所有o係大櫃, 櫃桶, 檯面既衫出黎,

逐件揚開睇睇, 要定唔要, 如果要既就摺番靚靚咁分類.

執呀執, 摺呀摺, 丟呀丟.... 終於丟左幾十件衫,

而要keep既衫呢, 就分好晒背心啦, 外套啦, 返工衫啦, casual衫啦, 常著&唔常著,

一一都"file"好晒, 大功告成.

至於鞋方面, 就丟左十幾對唔著既鞋, 唔駛擺到一地都係.

執執下鞋既時候, 見到有D鞋個鞋爭蝕左, 暫時著唔到,

而又見到有D spare鞋爭o係度岩用喎, 咁我就一時手痕, 不如試下自己換呢...

我記得D補鞋伯伯係點做, 就跟住試下啦, 撬下黐下dup下, 真係俾我搞掂左喎!!

好開心呀, 我講笑口up up咁話:「我可以轉行啦!」

跟住我阿爸答左一句:「死囉...」哈哈哈哈哈哈

~~~~~~~~~~~~~~~~~~~~~~

晏晝o係屋企睇銀牌決賽直播, 南華vs傑志,

傑志本來領先二比零, 仲諗住又俾傑志贏,

估佢唔到下半場六十分鐘先輸番四球,

肇麒真係旺到冇野好講, 當然佢的確係把握得好好啦.

我呢D局外人其實都冇咩感覺, 真係好想搵番對睇波既熱情.

~~~~~~~~~~~~~~~~~~~~~~~

新一年第一個月

2010年開始左差不多一個月喇,

其實唔想咁快自己唔如意.... 不過又確係麻麻地.

工作上.... 唉一言難盡, 日日都夜放工,

做到水都唔得閒飲, 廁所冇時間去, 又如何? End up又係meet唔到阿哥既要求.

唔同既係, 自己職又升左, 人工又加左, 所以唔敢有怨言, 只好dup低頭默默咁做.

私事上..... 太多野自己掌握唔到, 自己又唔係鍾意D問長問短既人,

因為我相信, 真係想我知既事, 係唔需要我開口問的.

可能就係因為呢個原因, 一個唔講, 一個唔問, 就好似大家慣左呢個唔講野既模式咁.

失望得太多, 為左保護自己, 「自我調節機制」已經長時間處於啟動狀態....

~~~~~~~~~~~~~~~~~~~~~~

獅子山上

尋日約左Carol, Vivi, Celina去行山,

本身話應該兩個零鐘頭行得晒, 所以滿懷信心出發.

我地由黃大仙既沙田坳道出發, 經獅子山郊野公園,

經過獅子山(我估係山頂, 不過唔知係頭定尾), 望夫石,

最後就落番紅梅谷, o係隆亨食D野就返屋企...

我地around 11:30am由地鐵站出發, 到落到紅梅谷都已經4:30pm

對我呢D冇乜運動, 又唔係行開山既人黎講, 都真係幾攞命,

大家睇下D相就知條路都幾崎嶇, 我冇損手爛腳返黎都經已好叻喇, 哈哈! 

返到屋企之後, 好似死屍咁動彈不得, 晚餐都冇食就上床休息lu.

~~~~~~~~~~~~~~~~~~~~~~~~

千呼萬喚既小豬新碟 - 羅生門:

~~~~~~~~~~~~~~~~~~~~~~~~~

第一次搭西鐵

今日係小妹第一次搭西鐵...

見今日冇咩做, 之前又幫Michael買左D iPhone殼未有機會俾佢,

所以就入左元朗... 冇錯係元朗睇波, 天水圍飛馬vs傑志.

第一次搭西鐵, 由尖東站(去左尖沙咀行街)到朗屏站都係半個鐘, 比想像中要快好多.

出左西鐵之後, 真係唔多曉行, 最後都係路在口邊....

差不多去到球場, 居然撞到阿Kay(機場的舊同事),

佢o係元朗住既, 所以佢去捧飛馬場喎.

入到去球場, 果然好新鮮, 同埋都已經幾爆(有瓦遮頭o個邊),

幾經辛苦搵到位坐, 點知又有條大柱擋住視線, 又要再搵第二個位.

呢個時候, 我真係好掛住我熟悉既旺角場同埋大球場...

anyway, 場波最後都係打和0:0, 兩敗俱傷, 南華繼續榜首.

完場之後, 連o係邊度等球員都唔知, Amy話呢度會有第二個出口, 叫我小心走漏眼,

好彩Michael岩岩做完訪問出黎, 我就同左佢講我帶左D殼俾佢, 咁就唔怕佢走左.

佢換左新殼之後, 自己都忍唔住話: 乜我個電話原來咁靚架!

(因為佢之前貼左一塊黃晒既膠去包住左部機, 都唔知邊個教佢既)

好啦, 冇咩特別就返屋企, 一出球場又行錯方向.... 兜左個圈先返到去朗屏站.

其實都唔知仲有冇機會要黎呢個球場睇波, 所以識唔識路都唔打緊啦.

~~~~~~~~~~~~~~~~~~~~~~

公司既淘寶之友越來越多, 我地explore既購物種類亦都越來越廣,

繼一個星期買左三轉iPhone accessories之外, 我地又轉戰high end衫,

Patch介紹左一間, 係佢老婆買左件皮褸, $580人仔, 好好quality咁話,

我地都揀晒款喇, 如無意外星期一可以落order!! 好緊張呀!!

~~~~~~~~~~~~~~~~~~~~~~~

紅豆世界

繼Carol送左一大堆紅豆野食之後,

我發覺其他地方都相繼出現不同既紅豆食品(新野或者重推):

首先係嘉頓重新推出停產左好耐既紅豆瑞士卷(早幾日已經食左):

之後係麥記出番紅豆批(尋晚食左):

仲有o係百佳見到灣仔碼頭出左紅豆湯圓(我未聽過湯圓有紅豆味)(買左未食):

仲仲有就係維記雪糕有紅豆沙夾心既雪米糍(唔買喇, 不過其他好想食)!!

真係好搞笑呀, 哈哈哈哈!!! 我好似俾一個紅豆世界包圍左咁.

~~~~~~~~~~~~~~~~~~~~~~

生日禮物

2010年返到公司, 就收到一份好有心意既生日禮物,

係我既Carolbaby送俾我架, 佢知道我鍾意食紅豆, 就買左以下既野俾我:

我真係好好好感動呀!!!

~~~~~~~~~~~~~~~~~

當然都要post番我其他一樣咁精彩, 一樣咁愛既禮物啦:

大家都咁錫我, 好開心...

~~~~~~~~~~~~~~~~~~

2009年大事回顧

2009年.... 一眨眼就過左喇... 唔知係因為忙既關係, 定係因為年紀大左, 總係覺得時光飛逝.

今日係1月1日, 回顧一下2008年究竟發生過D咩難忘既事:

真正咁見識到辦公室政治, 學會要戴起面具做人, 學會要保護自己.

雞仔最後一季踢甲組, 其實都係expected既, 佢永遠都係神級偶像, 好記得佢last一場有份上場比賽, 完場既時候, 我拍掌拍得特別大聲, 因為佢係郭裕洪, 係一個我覺得身為佢fans都感到自豪既好球員.

細榮掛靴了, compare with雞仔, 呢個真係比較意外, 不過亦覺得佢比雞仔幸運, 因為真係唔係咁多球員有一個屬於自己既告別賽.

一直都有聽過「寧波車」, 不過估唔到有機會出席佢既晚宴同埋同佢合照.

o個件「不成功便成仁」既事, 搞左個幾月, 牽連左我最好既朋友, 除左無言感激之外, 我都唔知講咩好... 記得當時阿超去左西班牙, 留番我一個人o係香港面對呢壇野. 而o個兩個始作俑者宜家仍然冇負過任何責任, 令到我同佢都要負起呢個沉重又長遠既committment, 冇後路亦都冇buffer.

留左廿幾年既分界頭, 終於都轉一轉喇, 留左D陰, 大家都話宜家咁樣好睇D呢.

同阿超為左同一件事, 嘈左無數次, 希望呢個話題可以永遠消失.

身邊既人有情緒病, 原來自己都會好大壓力好辛苦, 好彩最後佢都捱得過.

加入左淘寶行列, 連D同事都一樣, shopping得黎個荷包冇咁傷呢.

呢一樣其實唔係咩大事, 不過就肯定好難忘, 就係陸冠邦居然知道「赤壁係o係西貢o個頭」, 呢個係我2009年聽過令我笑得最開心既句字 (我估Erica都會認同).

Boyzone既Stephen咁後生就離開左我地, 令人覺得做人好多野都係估唔到, 唯有就係珍惜身邊既人, 為自己既幸福感恩.

相信好多人都估唔到香港波可以坐爆大球場(南華場亞協盃準決賽), 好慶幸我都有份參與!

見番好多年冇見既一班小學同學, 真係好難得呀.

見證香港隊o係東亞運創造傳奇一刻, 香港足球員唔係垃圾, 佢地係金牌運動員呀!

承上題, 12月13日生日, 我個嘜頭上左蘋果A1, 哈哈哈哈.

~~~~~~~~~~~~~~~~~~~

睇番自己2008年個回顧, 覺得2009年好似比2008年過得豐富.

豐富既意思, 係好多大上大落, 好多估唔到自己會遇到既人同事.

同佢既關係... 曾經想過要離開, 最後都留低左, 可以係因為唔忍心, 亦都可以係因為唔甘心.

其實, 如果我day one個決定唔係咁, 可能一切一切都唔會發生, 我都有責任.

宜家只係希望唔好再有咩不幸事件, 因為我地已經好累喇...

另外, 自己身體明顯差左好多, 好容易就病, 一病就可以兩個月都唔好,

睇黎真係好注意多D身體, 年紀大啦嘛, 哈哈.

工作方面, workload的確係重, 而自己亦有時真係冇心機做...

新一年, 職就升左, 希望自己都可以的起心肝俾心機做野!

情緒方面, 經過咁多事, 可幸已經學懂調整自己既期望, 去迎合根本可以預期既結果.

唔再為左一D控制唔到既事去失望, 雖然未係100分做到, 不過我會努力, 咁樣叫唔叫做長大呀?

2010年.... 大家都加加油, 身體健康, 事事順利呀知道嘛?

~~~~~~~~~~~~~~~~~~~