12比11, 睇過未?

今日入左元朗睇波, 久違了的雙料娛樂: 流浪vs傑志, 飛馬vs大埔.

頭場既流浪vs傑志, 睇到我熱血沸騰呀, 因為90分鐘打成1:1, 加時互無紀錄,

到射十二碼就精彩喇, 我睇波咁多年, 都未試過睇到射第十一輪(即係兩隊所有球員都射晒).

射到第十一輪之餘, 仲要係之前既廿一球係入晒架, 冇人飛機喎!

到最後一球, 流浪守門員隋維杰擋出傑志球員高文施射,

終於流浪憑總比數12:11贏左, 出線銀牌盃, 準決賽對手將會係公民.

另一方面, 見到傑志輸波, 仲要輸得咁轟轟烈烈, 我真係好痛快!!!!

~~~~~~~~~~~~~~~~~~~~~

講下花緒先, 話說講過話幫阿俊貼screen protector,

咁我今日入到球場坐低, 未開波, 阿俊就走黎問我係唔係宜家幫佢貼喎....

見佢心急成咁, 好啦宜家貼啦, 咁佢就走入更衣室拎部iPhone出黎俾我搞.

不過我真係好後悔呀, 因為o係室外地方貼真係好難, 因為有風, D麈係咁入,

所以end up我貼左兩張都唔完美囉..... 下次一定要o係室內貼.

又因為佢電話o係我手上, 搞到完場o個時我廁所都唔敢去, 費事佢出到黎搵唔到我.

佢出黎之後同我一齊睇左一陣波, 佢講左個秘密我知呀, 如果成事的話, 真係要恭喜佢.

~~~~~~~~~~~~~~~~~~~~~~

睇雞仔!

一路都好想去睇雞仔比賽(踢緊乙組既港迪), 不過D賽期次次都撞左甲組流浪....

終於今日冇撞喇, 所以好神心咁走左去高士威睇港迪vs南區.

離遠已經見到熟悉既身影, 十級興奮呀!!!

入到去搵個位坐低, 當時開左波五分鐘左右,

咁岩雞仔踢左翼係o係正我前面, 勁近喎, 我就舉機喪影喪影.

大約廿分鐘到啦, 雞仔入波呀, 真係型到爆燈,

之後佢都有好多下後踭呀, 扭幾個呀, 搓波搓到對手頭拎拎既表演....

雞仔雖然係圓碌碌左少少, 不過踢波依然係咁瀟灑!!!

我今日真係好開心, 好滿足, 我愛雞仔呀!!!!

~~~~~~~~~~~~~~~~~~~~~~~

淚管閉塞 + 丟iPhone

上星期日去左睇波, 流浪又輸喇 (輸俾飛馬1:2), 希望下場可以贏番啦.

完場之後, 我居然漏低左個電話o係看台喎, 好彩有好人心追上黎俾番我咋,

雖然我係好想換iPhone4, 不過未有白色我係唔會換住架!

話說阿俊又用爛左電話殼, 我幫佢班一個返黎俾佢頂住先,

今次呢個係軟膠殼黎既, 如果咁都用得爛, 我俾個叻佢啦.

另外, 我返鄉下之前問佢借左舊電黎用, 點知返到黎俾我用壞左....

~~~~~~~~~~~~~~~~~~

尋日忽然間隻右眼紅晒, 到晏晝頂唔順除左隻con, 不過都未見好轉.

(左眼清, 右眼濛真係好辛苦, 好頭暈, 不過除晒兩邊con我就更加睇唔到野)

放工去睇醫生, 醫生話我係淚管閉塞, 仲要係因為感冒而搞到淚管閉塞喎,

點解我次次感冒唔係塞呢樣就塞o個樣, 次次都已經鼻水倒流架啦, 今次有新野添...

今日起身, 見到隻眼都仲係紅, 不過已經冇尋日咁誇喇,

快D好番啦, 我唔想做四眼妹呀!!!

~~~~~~~~~~~~~~~~~~~~

經過星期日幾乎唔見電話之後, 今日又有經典,

話說食完lunch丟垃圾, 我可以丟左個iPhone, 而繼續拎住個汽水罐囉...

仲要係丟左之後, 我望住個垃圾袋, 心諗: 咦呢舊粉紅色既野咁熟口面既?

and then先發覺我丟左自己部電話!!!!!!!

好彩係公司breakout area既垃圾袋o者, 如果o係街既垃圾筒, 就不堪設想喇...

究竟我同呢個電話係唔要緣盡呢, 做咩三番四次我想甩開佢咁呢?

~~~~~~~~~~~~~~~~~~~~

其實呢, 你唔駛再同我報告你既行蹤架喇, 你既事我已經冇興趣!!!

~~~~~~~~~~~~~~~~~~~~

雲浮之旅

四日三夜既雲浮之旅完滿結束喇.

今次返鄉下, 主要係去大姨媽娶孫新抱既婚宴, 同埋順便"耍耍".

第一日到埗之後, 最O咀既就係大大舅父有好多好多田, 又有好多屋....

又見到好多親戚喎, 一去到真係好無奈,

一來唔知佢係邊個, 二來又唔識叫, 只可以係咁傻笑...

因為佢地好多地好多屋, 所以D仔仔女女都住埋附近, 成日都好熱鬧.

第二日就係婚宴既日子, 第一次見識到咁傳統既婚宴,

佢地係請人返黎煮, 廿幾圍, 都係擺o係屋企喎!!

又燒炮仗啦, 放煙花啦, 真係好墟陷.

另外最搞笑係我地輩份好高呀, 好多人叫我表姑/表姨, 最誇係表姨婆....

好彩一對新人斟茶既時候我閃開左, 費事好尷尬啦..... 我又未結婚, 冇得俾利是.

到第三日, 我地就去左祖屋上香俾公公婆婆,

間屋好神奇架喎, 未入屋o個時好熱, 一入到去就勁清涼!!!

去完祖屋就去祠堂, 不過真係太殘舊喇, 好似就塌咁, 都唔敢久留.

話說佢地養左一隻狗, 係打算養到咁上下就食..... 好殘忍呀!

大舅父仲話到大約廿八斤到啦, 就岩食喎,

我地(香港上到o個D)就話唔好食佢啦, 隻狗真係好乖架, 狂講話唔好食佢,

到我地去祖屋o個時, 佢都跟埋黎,

三舅父一聲令下: o拿佢拜左祖先, 唔好劏佢喇下!

就係咁, 隻狗就拎左免死金牌喇, 佢真係好有福氣呀, 咁岩我地上黎佢先唔駛死.

亦都因為咁, 我地幫佢改左名叫做"廿八斤", 簡稱"廿八"

相信下次返去佢會變左大大狗lu, 佢地話佢最多應該可以去到三四十斤(宜家廿零斤)

其實今次雲浮之旅都幾開心, 好多野以前都未見過,

不過最唔ok就係D廁所, 始終鄉下地方, 好簡陋,

再加上大陸唔興坐廁....... 踎廁好難開大嘛.....

~~~~~~~~~~~~~~~~~~~~~

重拾睇波既火

期待已久既南華vs流浪, 尋晚終於踢左喇, 雖然主角偉豪, 不過依然緊張刺激.

(Daphne同梁生都一齊睇呀, 好開心)

流浪打少個, 都可以追番一球, 隔多一陣仲要9個打11個, 都唔失波兼有攻勢,

臨完場姚韡仲要撼穿頭傷出, 8個打11個.... 可以維持2:1完場, 都算係咁架喇...

我好耐冇試過咁投入去睇一場比賽喇, 投入番感情去一隊波度真係唔同D!

流浪下一場對飛馬就慘喇, 已經冇左基藍馬, 冇左翟庭峰,

如果陳韶遠同姚韡趕唔切好番就死多兩錢重....

~~~~~~~~~~~~~~~~~~~~~

今日同匙匙, sandra同esther去左睇殺手靚太唔易做,

套戲就普普通通, 當係輕鬆小品還可以啦, 最緊要係Ashton Kutcher真係型爆!!

~~~~~~~~~~~~~~~~~~~~~~