郵輪假期 - 基隆/台中 Day 2

o係船上訓左一晚, 大致上都唔係好Feel到搖擺,
六點幾就起左身, 因為想上甲板睇日出嘛.
出左露台feel一feel天氣, 真係凍都PK, 仲要係十級大風!!
所以我地都重裝備(羽絨, 包晒頭)咁上去...
上到去甲板真係唔講得少, 大風到企唔穩... 我會用「極地」黎形容,
我唔相信一個正常人可以企o係度超過三分鐘......
天色都係比較大霧, 不過都睇到紅噹噹既咸蛋王, 吹到頭甩都抵既.

之後我地入番去餐廳, 對住個日出食早餐, 真係幾正.

食飽之後我地返房, 出露台影左D好瘋狂既相...
睇我地D頭髮就知道有幾大風.... 哈哈.

搞左一輪, 我地見Today有一個節目係尋晚表演o個個P.Rice教大家跳MJ,
咁我地就去番5樓中庭睇下啦,
嘩一見到阿P.Rice冇化妝個樣, 完全係另一個人, 咁我只可以講佢扮得好似.
佢逐個setp教我地跳, 其實唔難既, 都跟到, 不過平時冇幾何咁多人面前跳舞.

跳完MJ, 就去左睇尋日預早拎定飛既「馬浚偉星級美食節目」
(其實上船之前都唔知有呢D野, 係上到船之後先見到)
本身見冇咩野做, 就早D去個劇院坐住等,
點知佢關左門入唔到, 不過竟然見到有人龍排隊等入場(當時距離開始仲有一個鐘)!
有見及此, 我地就排埋一份, 費事到時個位太差啦....
(都真係唔敢話俾人聽我排一個鐘頭隊, 為左睇馬浚偉.... 奇怪....)

節目一開始, 係佢同Costa Victoria既行政總廚煮意粉:

之後佢返後台換衫, 期間就有靚仔意大利Pizza師父出黎表演同埋同觀眾試整Pizza:

之後馬浚偉就出番黎, 今次做Bar tender調酒, 之後就唱左幾首歌:

夜晚就係傳說中要著靚靚船長既Welcome Cocktail同埋晚宴.

今餐終於好食番少少, 原先每人只可以點一份既龍蝦,

因為我地俾左貼士俾serve我地個waiter, 所以我地特別可以食多份 XD.

食完晚餐, 飲埋cocktail, 就用USD20.00買左兩張Bingo碰下運氣,

最勁可以贏到USD1500.00架!!

不過好可惜最後我爭一個number就中到Full Bingo, 如果中到都有USD150.00架...

玩完bingo, 就去左劇院睇Musical.

呢晚個Musical叫做Rich & Famous,
成個表演係換左好多次造型, 仲要係以驚人既速度換裝, 佩服佩服.
如果唔想睇Musical, 亦可以去酒店坐下聽人唱歌,
呢個意大利鬼婆識唱國語歌架, 唔望到佢都唔知係鬼婆, 勁呀!

返房休息時, 一開門見到摺得好精緻既大象, 都唔捨得拆!

而姨媽間房就係天鵝, 仲要有埋個湖o個下勁丫嘛! 

~~~~~~~~~~~~~~~~~~~~~~~~~~

郵輪假期 - 基隆/台中 Day 1

人生第一次上郵輪.... 目的地本來想去下龍灣,
不過出發日期撞正小豬演唱會, 所以改為遲一星期出發既基隆/台中.
我地坐既船係Costa公司既Victoria (哥詩達維多利亞號),
好似係載二千幾人, size就我眼睇係雙魚星號既兩倍長度, 當然係高好多層啦.
今次我地一行四人, 我, 媽咪, 姨媽, 寶姨. 呢個組合係佢地最like,
因為佢地幾姊妹可以飛甩D老公s.... 哈哈.
~~~~~~~~~~~~~~~~~~~~
星期四o係尖沙咀上船, 上船前想影下隻郵輪啦,
一拎部機出黎.... oh shit, 又唔記得放番張memory card入去!!!
唯有去豐澤買啦... 朝早十點幾未開門, 等左一陣,
o個堆電器鋪最早開既係中原, 唔理啦, 最緊要快丫嘛.
點知個staff話佢地冇SD card賣喎, 頂丫! 佢話City Super會有喎,
咁我即刻9秒9行過去啦, city super係Harbour City最盡頭, 好Q遠.
去到City Super, 個staff又話佢地冇喎!!
行過隔離Page One, 又冇!
最後去左Hong Kong Records先有...
買完之後去番海運既另一個盡頭, Pacific Coffee會合番佢地.
o係Pacific Coffee食完早餐就去寄行李, 之後排隊check-in,
都排左成個鐘呀, 人太多又唔夠工作人員, D人又多野問喎,
卒之我地個籌係2:00先上船... 仲有個幾鐘喎, 行下先.
o係Harbour City周圍影下相, 再食埋Lunch就番去過Immigration上船.

~~~~~~~~~~~~~~~~~~~~~~
上到船梗係第一時間睇下間房先啦, 露台房喎,
一開門又真係幾正, 落地玻璃, 行出去個露台又幾大, 可以坐四個人傾計.

開船之後, 硬性規定每一個乘客都要參加Emergency Drill,

要求我地著救生衣, 跟住每一區既指示走去指定既救生艇下面排好隊,

仲要男人排後面, 女人小孩排前面, 好認真.

演習完之後, 就準備開船, 我地亦都去餐廳食Tea.

不過D野食就真係麻麻地.....

食完Tea, 就o係船既周圍參觀下, 全隻船有14層,
14樓頂層係日光浴場,
13樓係冇既, 12樓就有Pizza餐廳, 網吧, 麻雀室, 室外有網球場,
11樓有沙律吧, 自助餐廳, 甲板有泳池, 按摩池, 乒乓波台, 足球機, 船尾有個露天酒吧,
5-10樓都有客房, 而其中:
9樓10樓係露台客房, 下面幾層係海景房, 而每層係內圍就係內倉房.
7樓仲有西餐廳, 酒吧, Casino, Spa, Salon, Duty Free等等.
6樓都有西餐廳, 酒吧, Disco, 劇院, 兒童遊戲室, 影相Studio,
5樓Atrium, 都有西餐廳, 客戶服務櫃台, 中庭可以用黎做小型表演場地,
4樓好似都係冇既, 3樓就係診所, 其他地方就係機器呀, 倉庫呀, 總之唔係我地去既.
(以上呢D Detail係我住左幾日行熟晒背得出)

~~~~~~~~~~~~~~~~~~~

行左一輪, 休息下就差不多時候睇日落喇,
我地行去11樓船尾, 見到好多人都已經舉晒機影相.
唔知係咪因為o係海中心既關係, 海面好多水氣霧氣,
所以睇落有D濛濛地咁, Magic Hour既天色亦唔係太明顯,
不過勝在一望無際, 好舒服.

睇完日落六點鐘, 就係食晚餐既時間 (安排好晚餐分頭尾圍, 我地係頭圍),

Menu分意大利式同中式, 可以mix黎點,

又或者你鍾意可以叫5個appetizer, 4個湯, 唔要Main course, 再3個dessert都得, 任你叫,

不過D野食又係嚇死人, 可以用難食黎形容.....

求其填飽個肚, 就睇下當日有咩節目先,

(每晚船公司都會派一張叫Today既紙去房度, 話你知第二日天氣, 日出日落時間,

幾點有咩節目, o係邊度同埋Dress code等等)

今晚有一個叫做P. Rice既人會表演Michael Jackson模仿秀, 

同埋介紹左D娛樂團隊既人出黎, 呢幾日o係船上面所有entertainment都係佢地負責.

睇完Show之後, 就返房沖涼休息,

一入去當然見到下一日既Today已經放o係床上面,

出去露台一睇真係勁驚, 因為出面完全漆黑, 只係見到打落船身既白色浪花,

同埋沙沙既浪聲, 呢個moment諗到既就係: 跌落海死梗.... 

~~~~~~~~~~~~~~~~~~~~~~~~

羅志祥舞極限世界巡迴演唱會2013

小豬上次黎香港開演唱會係2011年嘅舞法舞天, 不幸地只買到$480飛坐山腰.
今次好開心Ceci幫我地買到$880, 真係開心到彈起呀!
入到場見到位置都唔錯, 路口位可以俾我行出少少冇遮擋.
今次既主題係豹(爆)發, 舞極限,

所以一開場一段Video係小豬化身成雪地上一隻黑豹.
到小豬出場既時候真係興奮到爆炸,

開場第一首歌係「有我在」, 本身仲估會係主題曲「舞極限」添...
之後係我覺得佢跳得超型既「獨一無二Only You」,
不過都係o個句, 最Perfect應該係好似MV咁著西裝跳.
跟住就到點題作品「舞極限」.
緊接就唱左比較冷門既「忍住」同埋好Sexy既「美麗的誤會」

~~~~~~~~~~~~~~~~
之後舞台個theme由雪山變左熱帶雨林,
一連7首快歌, 最Surprise係佢Solo左「WOW」

講番少少background: 呢首歌俾蕭亞軒之前, 原先係俾小豬既,
不過小豬第一次聽覺得冇乜特別, 就Reject左,
點知到蕭亞軒要左, 重新編曲之後大愛, 仲認唔番係自己reject左個隻, 哈哈.
之後唱「戀愛達人」, 呢首不嬲都係握手互動位,
不過今次由於有太多人掉毛巾俾佢擦汗, 搞到佢唱唔到要NG再黎.

And then「幸福囉」都係My favourite.
亦可能因為佢掛住同Fans影相, 搞到唱Twinkle時甩晒, 自己都忍唔到住笑場.

呢一Part最尾就係嘉賓出場, 上一場係林志穎, 今場竟然係..... 杜德偉.
呢個moment我當堂down左, 有冇搞錯.... 徙晒啦!
我都佢小豬好崇拜佢, 當年2008年演唱會向舞王致敬都有佢份既,
不過.... 香港既朋友其實都麻麻地佢嘛....
好彩佢只係唱左半隻「脫掉」, 唱左一陣水, 跳一小後舞就走左.

~~~~~~~~~~~~~~~~
第三部分, 舞台變左個大教堂,

原先o係台頂大豹頭徐徐降落, 小豬就企上去再升高, 開始慢歌部分.
第一首慢歌係呢期熱播既「空中飛人」, 100個Like呀!
歌好聽, 唱得更好!

「搞笑」其實我普通, 不過知道一定唱.
另一個估唔到係唱「愛入非非」, 因為都唔係派台歌.
最感動既環節: 全場大合唱「我不會唱歌」

我也懂　拿Mic的手不能顫抖

曾握著　就能感受你比我難過

誰寫的　歌詞那麼適合放手

我怎能捨不得... ...

之後兩首都係好愛既「習慣就好」同埋「不具名的悲傷」

真心覺得佢唱得好好, 佢D慢歌唔係咁易唱.

~~~~~~~~~~~~~~~~~~~

唱完一輪慢歌, 就播左一段介紹dancers既片,

有幾何會有演唱會俾咁多時間去介紹D dancers,

小豬自己都係舞者, 當然會想俾番credit佢哋啦,
呢一個部分我支持既 (雖然有DD悶場).

播完片, 小豬亦都換好衫Set好頭出黎Party time.

台上面多左一架車, 不過香車美男都唔係重點,

重點係佢個頭, 原來粉紅長髮Punk頭都幾襯佢喎, 型爆!!!

唱左最經典既「箇中強手」, 「一支獨秀」,

同埋等同五月天會唱憨人一樣, 一定唔少得既「精舞門」

今次「精舞門」既Special係用「忐忑」黎編功夫舞, 當然係搞笑版啦.

最後就係「舞法舞天」, 佢話係最後一首歌, 不過大家都知道係騙人的,

所以佢超浮誇地話唔最後一首喇, 唔捨得大家呀.... 白痴嘛, 哈哈.

~~~~~~~~~~~~~~~~~~~

Encore部分, 如果係台北場, 呢一part小豬會o係場館飛起來唱「愛走秀」

不過好可惜紅館做唔到啦.... Anyway都係好氣氛既.

緊接都係輕快既歌「愛瘋頭」, 佢上次演唱會Encore都係唱呢首.

之後好開心唱新歌「鬧翻天」, 呢首歌我唱K唱過, 係快到唱唔到的.

真正最後一首歌係「全城熱愛」, Super Like!

完場大約11:10pm, 覺得有D早, 唔係好夠喉咁.

~~~~~~~~~~~~~~~~~~~

完整Rundown如下:

1. 有我在
2. 獨一無二ONLY YOU
3. 舞極限
4. 忍住
5. 美麗的誤會
6. 愛的主場秀
7. WOW
8. 戀愛達人
9. 幸福囉
10. TWINKLE
11. 撐腰
12. 脫掉（feat. 杜德偉)
13. 空中飛人
14. 搞笑
15. 愛入非非
16. 我不會唱歌
17. 習慣就好
18. 不具名的悲傷 
19. 筒中強手
20. 一支獨秀
21. 精舞門(Special - 忐忑)
22. 舞法舞天 
23. 愛走秀
24. 愛瘋頭
25. 鬧翻天
26. 全城熱愛

~~~~~~~~~~~~~~~~~~~~

今之演唱會係由小豬首次自己擔任形象設計同埋舞蹈總監,

個豹妝其實我覺得有D over, 不過at least演唱會入面冇化出黎就OK.

Vivi同Ceci覺得唔好睇, 我估係因為小豬講太多野,

我同陳慧敏又接受到喎, 可能因為我地都當睇台灣節目一樣,

佢D梗我地都有follow開所以好明.

打完篇Blog就發覺基本上我鍾意既歌都唱晒, 所以好滿意.

臨尾都要加一句: 小豬真係堅型!!!

~~~~~~~~~~~~~~~~~~~~~