第三日, 我地離開高雄, 搭台鐵起行去台南.
本身都知道酒店同火車站有一段距離, 不過我地都真係行左好耐先搵到,
最好笑係, 我地竟然俾人問路!!!!
哈哈哈哈, 我地當時擺明頭昂昂都唔知自己o係邊咁既樣架啦....
我諗都行左半個鐘, 由想搵野食變左搵酒店.
一去到呢間佳佳小南天, 感覺都唔錯, 好親切.
酒店既reception姐姐仲好nice咁教我地點去一D熱門既景點.
我地首先去左聞名已久既度小月醫肚, 當然試下最出名既擔仔麵啦.
食完野, 就去左對面街既「赤坎樓」參觀.
之後搭的士去左「安平古堡」同」「億載金城」
以上既景點其實都係同鄭成功有關既古蹟,
對於我呢D對中史零興趣既人黎講都分別不大.....
比較有趣既已經係「安平古堡」附近既延平老街,
我仲買到黑糖薑母俾媽咪, 雖然同淡水買既仲有D距離,
不過已經好過D沖濟好多喇.... (不過我就要揹住盒磚頭行街囉...)
參觀完戰爭古蹟, 就去左孔廟.我對孔子最深刻既印象, 就係「大學之道, 在明明德....」雖然都唔係好知點解.
之後我地去左附近一間好有feel既cafe歇一歇腳.
呢間cafe叫做「小說」, 入面好似好有文化氣息咁, 仲有三層咁多添.
同cafe既店員傾左幾句, 先知道台灣係冇聖誕節假期的,
唔怪得黎左幾日, 完全feel唔到任何聖誕氣氛啦.
飲完咖啡, o係附近再逛左一陣, 就去左一個Vivi既指定「景點」:隨緣茶居.
呢個茶居個環境好優雅, 入到去竟然係有小橋流水,
D錦鯉仲會o係你張椅隔離游來游去...
我地足足o係呢度坐左最少兩個鐘, 飲左好多壺茶(先回到本嘛)先走.
抖足晒精神, 就去左大東夜市附近既誠品, 睇完書再去夜市.
呢個夜市超大, 不過亦都超多人... 我地因為太飽啦, 所以冇食野就返酒店lu.
o係酒店hea左一陣, 我覺得肚餓呀, 所以就去左一間好地道既舗頭食鴨肉飯.
平安夜就係咁樣過左喇 (最有氣氛既已經係酒店既電視節目)
~~~~~~~~~~~~~~~~~~~~~~~~~
行程最後一日, 一開房門見到酒店送俾我地既聖誕小禮物, 真係好窩心呀!
今日我地去左海安路藝術區, 好可惜大部分都未開門呀.
影左一陣相之後, 就搭的士去火車站返高雄喇.
返到高雄, 我地去左傳說中既愛河.
我諗夜晚黎應該會靚D既, 漫無目的行左一陣就去搵野食喇.
行左好耐, 搵左一間小舖食豬血湯.
我估碗湯應該有15粒Size大粒過麻雀既豬紅, 飽到我嘔都食唔晒囉...
由於之後真係冇咩地方好去既關係, 4點幾我地就去左機場,
仲要太早搞到未有得check-in囉, 哈哈.
我地兩條友攬住部iPad做人, 好彩download左套Twilight Saga.
幾辛苦等到七點幾, 班機仲再delay左半個鐘!!!
就係咁, hea爆既第四日就完結喇.
~~~~~~~~~~~~~~~~~~~~~~
呢個高雄/台南之旅都真係幾hea,
可能因為目的太鮮明既關係(睇五月天), 搞到day1做完之後,
後面幾日都唔知做咩好咁.
不過本人係非常之咁滿足, 因為五月天真係好好睇呀!!!!
~~~~~~~~~~~~~~~~~~~~~~
沒有留言:
發佈留言