岩岩十一國慶, 一家人去台灣玩幾日(兩者好似冇乜關係喎....)
上次一家人出遠門(唔計返大陸)已經係中學既事喇, 諗番都真係不孝.
星期六搭早機出發, 好衰唔衰班機delay左大半個鐘,
落機之後搭國光客運返西門町既捷絲旅酒店, 等車又等半個鐘喎,
呢間酒店真係搵死人, 唔係佢地點偏, 反而係極之方便添,
問題係佢個門口大堂實在係低調沈潛, 真係我行過左兩次都見佢唔到囉!!
搞左咁耐, 爸媽又累又餓喇, 就出去搵D野食, 食完就出發去淡水.
~~~~~~~~~~~~~~~~~~~~
Day 1: 落機 - 酒店 - tea - 淡水 - 士林夜市
由於好多野delay, 搞到D時間甩晒, 去到淡水都已經天黑lu,
加上又落雨, 睇日落既如意算盤打唔響添, 不過唔緊要, 行下睇下食下relax下都開心.
我地一去到淡水老街, 見到一間好好似好好味既夾餅店,
諗都唔諗就入去幫襯啦, 嘩真係太睇少佢既份量, 又厚又大又多料,
食左一半已經飽到頂住.... 哈哈.
邊食邊行, 見到好多好懷舊既遊戲攤位,
仲有一間叫淡水故事既鋪頭, 專賣一D我爸媽兒時年代既零食, 睇得阿媽好開心,
行完淡水, 就搭捷運去士林夜市, 我地一去到有少少迷茫,
跟手就有一個小販阿姨主動同我講:「逛的這邊, 食的那邊」
原來士林夜市係分兩邊既, OK清楚晒, 我地去左「食的那邊」先.
最誇張就係豪大大雞排, 排左成50人都有, 痴痴地.... 當然我地冇排啦.
之後入去D食檔入面, 食左蚵仔煎, 花枝羹, 刨冰etc.
食完就過去「逛的這邊」, 都係賣衫賣鞋, 有D似女人街/花園街,
最經典係見到有任天堂紅白機賣, 仲要有game帶添呀, 勁!
行行下見到有胡椒餅, 記憶中好似都係出名既, 就買黎食啦, 真係唔錯喎!
食飽飽就返油店喇.
呢間Just Sleep Hotel係Linus介紹既, 真係好得, 地方唔大, 不過好精緻,
長型房, 兩張床係打長擺, 兩個床頭中間係一個小梳化可以睇電視,
仲有兩張書檯, 兩個擺行李既架, 廁所同沖涼房係分開既.
如果係兩個朋友去住, 就一流, 因為有自己既私人空間.
房窗口望出去就係西門町 不過唔係最旺最中心o個幾條街.
~~~~~~~~~~~~~~~~~~~~
Day 2: 木柵動物園 - 貓空纜車 - 返酒店小休 - 師大夜市 (因為爸媽體力不繼加上天雨, 改為火鍋)
經過舟車勞頓, 呢日瞓晏少少, 九點幾先起身, 十點幾先出門口.
搭捷運去木柵動物園, 車站一出行幾分鐘就到.
呢個動物園真係大到喊, 根本行到腳斷都行唔晒....
有D area skip左, e.g. 亞洲熱帶雨林區 & 雀鳥區, 同埋非洲動物區都行唔晒.
可能我少去旅行, 好多動物都係第一次親眼見, 所以好興奮呀!
斑馬呀, 長頸鹿呀, 袋鼠呀, 河馬呀, 樹熊呀, 黑熊呀, 梅花鹿呀, 山羊呀....
行到死死下之後, 就搭貓空纜車上貓空喇,
因為動物園入面有個站, 所以直接o係動物園內站上車, 唔駛出園.
(如果我一早知道佢地試過成卡車跌落黎, 我打死都唔會坐, 諗番都驚呀!)
上車之前都唔係大風既, 不過一路上就一路聽到D風呼呼聲,
呢個纜車真係好高呀, 坐到好驚, 而又落雨搞到天色唔好玻璃又濕晒, 大打折扣.
去到貓空總站, 雨越落越大, 我地快腳搵個地方坐低食D野,
本來打算行下D茶坊嘆下茶, 不過天氣比到埗之後更加惡劣, 所以決定盡快返到纜車站.
呢個時間, 好似打十號風球咁, 我眼見所有人既遮都係爛晒, 企都企唔穩,
都唔知點解纜車仲開, 而我又仲坐...
上到車, 見到前面卡車係左右搖擺, 跟手feel到自己卡車都係有fing, 宜家先識驚!
今次唔再返入動物園喇, 直接坐返去頭站就走喇.
呢個時候我地都真係累, 所以都跟番schedule就係返酒店休息一下.
見到佢地累到咁, 而且又係咁落雨, 所以取消左師大夜市, 改為留o係西門町食火鍋,
上網做左少少research, 就去睇下好幾間出名既e.g.飛天麻辣, 馬辣, 鍋大爺, etc,
全部都排長龍.... 冇book檯都唔知等到幾時.
所以一路順其自然搵下, 就搵到一間叫做「鍋爸」既好似唔錯, 又唔算爆多人,
我地等左唔駛半個鐘就有檯, 三個人可以點三個湯底,
NT$399自助形式任食, 肉類即叫即切俾你, 海鮮都好新鮮,
Movenpick雪糕仲要有埋脆筒, 真係開心死呀!!! 哈哈.
食到眼瓊瓊, 捧住個肚返酒店.
~~~~~~~~~~~~~~~~~~~~
Day 3: 中正紀念堂 - 十分 + 九份(台灣東北面暴雨成災, 改為東區行街) - 美麗華商場摩天輪
o係酒店Hea到成十一點, 先想去一去Stage
跟住Stage個Website個地圖, 竟然去左舊鋪... shit!
咁新鋪搬左去邊? 得個地址我鬼識路!
亂行亂行, 行到見到個大招牌, 我估係呢度啦,
咦? 只見其招牌不見其鋪喎, 我睇相既時候, 旗艦店明明好大架喎...
又兜來兜去, 終於都搵到喇, 原來我頭先行路個方向岩岩背住睇唔到.
不過好可惜佢未開門呀, 唯有夜晚再黎啦....
And then就出發去中正紀念堂, 我上次去台北都冇去過.
細雨濛濛下到達自由廣場, 原來地方好大好宏偉.
(小女子未去過天安門廣場, 只係去過皇后像廣場)
行到去中正紀念堂, 岩岩miss左三軍儀隊交接儀式, 冇辦法啦o係外圍同入去影下相算
完左呢個check point, 就去東區閒逛下, 因為想去微風廣場既Hands Tailung.
行左一陣佢地又見累喇, 所以又要返酒店攤抖下,
到七點到啦, 就出發去美麗華商場坐摩天輪睇夜景,
不過之前都要去返朝早未開門既Stage, 夜晚開左燈靚幾多!
都知自己唔會有幫襯架喇, D野咁貴, 所以運完吉就閃.
又係搭捷運去到劍南路, 一出站已經見到摩天輪, 又係幾分鐘腳程就到.
都唔知做乜自己明明畏高都會坐, 上到去Feel到腳軟, 唯有影下相分散注意力,
仲要好彩坐唔到透明車廂咋, 如果坐到, 真係喊都冇用!!
睇完夜景又係返西門町既時候, 食左「繼光香香雞」同埋「阿宗麵線」,
不過好明顯阿爸唔like, 所以最後都要搵間餐廳食飯.
~~~~~~~~~~~~~~~~~~~~
Day 4: 酒店check out - 西門町最後小逛 - 台北車站地下街 - 機場
起身食早餐, 執行李, Hea到11:30am 退房.
行左一陣誠品116, 其實都冇咩睇,
之後就去維格買鳳梨酥同埋綠豆糕(其實機場都有維格, 不過驚是但一樣冇貨就賴野)
買埋野, 就離開西門町喇.....
去到台北捷運站就先到「站前地下街」我記得上次黎台北都成日經過呢度,
呢度D野係比較舊同埋街坊少少, 我地o係度食lunch,
而「站前地下街」隔離, 就係「K區地下街」.
「K區地下街」靚同新好多, 去左誠品書店打左一陣書釘, 又坐低食削冰.
行完地下街, 就上番地面去左新光三越隔離既K Mall,
o係入面一間NT$39(即係香港既$10店)買左兩包髮卷, 哈哈.
時間都差不多, 就去留台北車站搭番國光客運去機場,
沿途都有D塞車, 不過時間都好充裕.
其實今次由步出桃園機場一刻, 到最後一日上機一刻, 都冇停過雨,
不過好彩唔係滂沱大雨, 如果唔係可能更加多地方去唔到.
~~~~~~~~~~~~~~~~~~~~
今次miss左十分同九份, 好希望短期內可以再去呀!
同埋台北呢個地方有樣野令我好impressed, 就係人民素質!
士林夜市呢D地方, 地下點解可以完全乾爽, 地下垃圾/紙巾都冇一張, 仲要冇乜垃圾桶架喎.
搭捷運冇人爭位坐, 明明成架車坐滿人, 博愛座都係吉既, 又見到好多人主動讓座.
上落扶手電梯, 永遠冇人o係側邊攝入黎, 一定排一條好直既隊一個一個上.
o係街問路呀, 食肆呀o個D人全部都好有禮貌好nice.
雖然, D街道, 交通工具的確係比較殘, 不過at least乾淨,
好似捷運站有D畫貼左o係牆, 冇玻璃冇鋪膠, 不過一D都冇爛冇污糟.
呢D野, even o係香港都唔會咁好,
俾你好似大陸咁, D基建起得幾新幾靚都好, 人民素質差就講咩都冇用.
~~~~~~~~~~~~~~~~~~~~~
