澳門行 + T1 21 31 21

我知道聽日應該會好多野寫, 所以今晚寫咁D先(呢個原因係咪好奇怪呢?)
講左好耐既澳門行終於十一月去得成, 四人組合分一間房, 所以都唔貴.
我同vivi星期五下晝過去先, 因為我地都放到假, 同埋星期五既既酒店平好多.
落左船之後想食既餐廳都唔做我地生意, 因為佢地午休喎,
你話呢D生活幾令人嚮往丫.....
最後去左間叫檀香山既餐廳食少少野頂肚(當時已經係三點喇!)
食完野周圍行下, 你問我去過邊我都唔係太up得出, 不過都係我未去過既地方.
我記得去左二龍喉公園坐松山纜車啦, 燈塔啦咁.

最估唔到我地去左個藝墟, 而我竟然買到野喎,
係一個紫水晶吊咀, 平時好少見到有呢D紫晶塊黎做吊咀, 好特別.

本來仲有係瑪瑙吊咀仲特別, 不過太浮誇好難襯衫囉...
夜晚阿Per同陳慧敏都到埋, 我地去左一間葡國餐廳既餐,
入面幫襯既都係葡國人, 咁我相信應該好地道.
D野食都好OK, 唔知係唔係太肚餓既關係, 連牛油麵包我都覺得好好食!
(其實去澳門唔係應該任何時間都好飽架咩? 當日完全係處於飢餓狀態)
食完野返酒店, 我地仲要o係酒店商場食cake同飲野,
D cake既吸引程度係10分!!! 明明好飽都勁食, 哈哈.

~~~~~~~~~~~~~~~~~~~~~
第二朝, 明明話可以自然醒, 點知有人好早起左身, 行來行去咁搞到我都醒左.
好喇, 你問我我第二日去左邊呢? 我都係唔係好up得出,
應該係去左舊城區同埋咩瞭望台咁啦, 淨係知道行好到累咁.
D地方我基本上都冇去過, 可能因為我平時去澳門都係去賭場多啦.
晚餐終於食到媽閣長城燒烤(即係第一日去到唔做我地生意o個間),
野食都唔錯, 價錢合理, 下次黎澳門都可以再食.
我地搭9:45pm既船返香港, 見到個頭好大既洪卓立, 算唔算celebrity collection? 哈哈!
~~~~~~~~~~~~~~~~~~~~~
返到香港, 竟然肚痾左幾次, 同埋個人好累好累咁,
第二日仲發燒添.... 本來去Ricky結婚o個餐都去唔到....
第三日都係唔舒服, 要請日sick leave休息下,
睇黎今次澳門行都幾大代價.
~~~~~~~~~~~~~~~~~~~~~~
Ukulele今日上到第五堂
(其實我skip左第三堂冇上, 不過我之前o係youtube自學左4個chord, 咁岩o個堂就係教呢D)
蘇基阿sir講過話個course會包學五月天一隻歌, 原來就係今日喇!
完整咁學晒全首T1 21 31 21, 其實好簡單,
最難既地方係撳弦要夠力, 轉chord要夠快,
就係咁, 上堂係咁彈, 返屋企又係咁彈,
搞到宜家左手三隻手指頭又紅又痛.....
下一堂上唔到, 不過阿sir話教Beyond既喜歡你, 咁唔上都唔係好大損失卦.
~~~~~~~~~~~~~~~~~~~~~~~