打風唔成仲要黑雨

今個星期以為可以打得成風, 點知打風唔成不特止, 仲要臨放工黎黑雨...

其實次次落大雨, 由華蘭路至濱海街個段英皇道都會好似一條急流,

所以都唔駛點避水tum, 因為最後點行都會俾水浸到腳眼.

~~~~~~~~~~~~~~~~~~~~~~~~~

阿俊上堂既第一階段完結, 今日放一日假, 聽日又要上大陸一個星期,

佢尋日出camp之後打俾我, 我忍唔住將我頂住條氣既事講佢知,

我話左我唔理架喇, 阿俊都叫我唔好理.

~~~~~~~~~~~~~~~~~~~~~~~~~~

星期二約左Joycebaby食飯, 講起原來我呢幾年都幾冤孽,

一D自己最接受唔到既事, 偏偏不斷咁發生,

其實經過咁多事之後, 我都已經化化地,

因為太多野係自己控制唔到, 任你點樣千計萬千, 點長遠點努力點堅持都好,

最後turn out都唔一定係你預期既結果.

所以都係活在當下, 放輕鬆, 對得自己對得人, 開心就得喇,

以後既野, 以後先算啦.

~~~~~~~~~~~~~~~~~~~~~~~~~~~

打手

頭先阿超打黎, 話send份proposal俾我睇, 幫佢comment下.

內容大致上都冇問題既, 不過字眼同format就要大執喇,

仲要係中文proposal喎, 中文先難搞, 唔知幾耐冇寫呢D"實用文".

唔執由自可, 一執就執左兩個鐘......

執完個word file仲要執埋個計expenses既excel, 呢個先精彩呀, 冇formula既???

最憎人地唔用formula計數... 又係大執啦!! 又執左半個鐘.

終於都搞掂, 我真係覺得執完靚仔左好多囉, 哈哈!!

佢好強調呢份proposal既內容既confidential, 知啦當我傻架咩!!

~~~~~~~~~~~~~~~~~~~~~~

你同我每一次對話都提起佢喎, 係唔係代表你介意呀?

介意都冇用架喇, 太遲, 我既事你真係管唔到!

~~~~~~~~~~~~~~~~~~~~~~

睇波? 唔去呀!

我都話我係因為雞仔踢頭場先會想入場睇波, 你明知架喎,

你要等偉豪到左球場先拎到飛俾你, 你又係明知架喎,

點解你尋晚唔係咁講既? 昆左我去先算呀?

如果一早知道係咁遲先拎到飛既,

我根本唔會話去, 連考慮都唔會, 一切廢話收埋唔該.

好彩我都醒目, 死都唔出門口o者, 如果唔係咪半天吊?

同埋... 我唔鍾意你搵佢黎撻我.... 堅唔鍾意.

~~~~~~~~~~~~~~~~~~~~

晏晝我連電視直播都唔睇, 去左睇"人間喜劇" (有同事送飛俾我)

唔.....真係麻麻.... 大家唔睇都冇損失.... 同尋日套Toy Story真係天同地比.

~~~~~~~~~~~~~~~~~~~~

阿俊入左camp幾日, 今日居然見到佢上MSN,

佢下個星期又要返大陸到月尾先返, 即係半個月都要上堂.

七月阿仙奴足球學校唔駛預佢.

~~~~~~~~~~~~~~~~~~~~~

Hum把爛燦Amigos

尋日(星期五)係我有史以來o係公司最黑面既一日.

我o係完全冇做錯野既情況之下, 俾BC喪片喎, 仲要不停咁講,

喂你擺明老屈, 我梗係唔gur架喎, 咪全程team meeting黑面囉, 黑到非一般既黑.

完晒之後, BC同Louisa, Martin, Carol, Patch, Thomas去食飯,

佢地話BC叫佢地返黎氹番我喎.... 車....

不過我好開心D同事好錫我, 個個都黎氹我開心,

Celia仲帶我上佢屋企, 叫小虎同我玩添呀....

~~~~~~~~~~~~~~~~~~~

放工之後, 去左麥花臣睇東南海盃, 阿俊又話佢會去, 點知去到唔見人,

好彩細榮o係度, 我都好似好耐冇睇細榮踢波喇.

好可惜佢地最後都係輸左啦, 完左之後我冇跟佢地去食飯就返屋企喇.

~~~~~~~~~~~~~~~~~~~~

今朝約左我既buddies - Tracy, Esther同Sandra去睇Toy Story,

真係十級好睇呀!!!! 笑死我喇!!!! "Hum把爛燦Amigos" 哈哈哈哈!

睇完戲, 返屋企換件衫就出球場, 因為約左人傾傾阿仙奴足球學校個website.

唔知點解我去講幾句之後, 會帶左份功課返屋企囉.....

anyway, 我都想阿仙奴足球學校搞得好好睇睇既, 盡人事啦.

~~~~~~~~~~~~~~~~~~~~~

探班 - 第二堂

星期五公司team building活動, 去左學整cake.

個cake好複雜呀, 整到半路已經知道自己o係屋企係整唔番的, 所以enjoy左就算啦.

睇下係唔係好得先, 我都好理解人地一見到就叫我整俾佢食, 哈哈!

有D人真係腦袋有問題, 錯埋一D冇可能錯既事,

連老師都要串佢: 我接受唔到囉...

嘩真係全場笑爆咀呀!!

~~~~~~~~~~~~~~~~

今日應邀再去左探班(阿仙奴), 第二堂喇.

睇見D小朋友真係精力旺盛, 而教練們就真係睇到佢地累, 不過都冇揸流灘!

我早兩日已經幫手向朋友/同事極力推介, 希望真係可以再搵多D學生俾佢地.

完左之後同阿俊同陳浩然去食飯,

(我一早已經問定, 冇飯食我係唔出球場架, o係屋企嘆冷氣唔好...)

去到餐廳坐低冇耐, 就見到阿超, 穎琴同埋另外一個教練+一個細路入黎, 有冇咁岩呀.

兩堆人就當然係分開坐兩張檯啦, 陳浩然同阿超講講下, 阿超直頭過埋黎搭檯...

就咁, 成餐飯係佢地三條佬自己講野, 我冇機會出聲囉, 搞錯呀, 唔like.

~~~~~~~~~~~~~~

世界奇聞日

今日真係世界奇聞日, 想唔寫低都唔得.

奇聞(一):

話說新同事Thomas今日on board, 我上個月尾已經拎晒老闆approval幫佢apply ID,

我一路追, 都追唔到information security個endorsement, 今日再追佢地個VP,

終於information security打黎喇, 佢問左一大輪我地係咪DBS staff呀,

如果唔係DBS staff, 咁點解要用DBS個email同埋internet browsing,

我已經好好心機咁解釋俾佢聽我地個JV background呀, 我地成team都係呢個情況呀咁,

點知佢再問... 問我係咩身份, 之後係邊個approve我地D ID喎....

唉, 周旋左一輪, 佢又話要問一問先.... 即係仲未approve....

~~~~~~~~~~~~~~~~~~~

奇聞(二):

幫Thomas apply access card.

又係同一個問題啦, 唔係DBS Staff呀諸如此類,

佢話要睇我地同DBS簽既contract, 我話我地係HWL既staff, 冇同DBS簽contract架喎,

之後佢話要睇HWL同DBS既agreement!!!

我話:「咁你係唔係要睇和黃199x年簽落既joint-venture agreement呢?」

佢就窒一窒, 話要問一問先.... 即係仲未開得.....

~~~~~~~~~~~~~~~~~~

奇聞(三):

話說同事D notebook睇pdf file有問題, 我已經搵IBM同DBS IT既同事搞掂左,

不過當時因為BC唔o係位, 所以爭佢一部未搞,

o個個IT同事話, 如果BC遲D有時間, 就call佢搞.

好啦我今日call佢, 佢居然否認自己幫我整過D notebook,

仲大條道理咁話:「你呢D case應該搵IBM搞架, 我係DBS架喎, 我唔搞呢D架喎」

我話:「我知, 我當日都係搵IBM先架, 不過係你話呢D唔關software問題, 而係settings既問題,

所以先係你整, 你o個日仲話係你過開黎OIE開會, 所以順手整埋架嘛」

我都已經講到咁detail, 佢都堅持話唔係佢, 叫我搵IBM...

就係咁, 我吹脹左.....

~~~~~~~~~~~~~~~~~~

奇聞(四):

今日我地去左美心皇宮食welcome lunch, 食完返到公司, 收到美心打黎既電話,

佢話:「你地張檯未簽單就走左喇喎

(好似我地食霸王餐咁, 不過我明明睇住Louisa簽左架喎)

我double check Louisa, and then同佢講:「唔係喎, 卡都簽埋架喇喎, $1250丫嘛」

佢話:「係未簽喎, 你地連張卡都未拎番, 你地張檯o係間房入面架嘛」

我話:「間房有兩張檯架喎, 你地有冇搞錯左呀?」

佢話:「你地簽匯豐卡架嘛」

我話:「我地簽星展卡架!!」

佢話:「咁呀, 我地再睇睇先...」

~~~~~~~~~~~~~~~~~