睇波 x 2

掛住寫BBQ, 都唔記得寫番睇左兩場波添.
星期三約左Jardines舊同事吳祺禮, Bobby同阿Mung一齊睇英超亞洲錦標賽.
特登揀左o個日Red day, 可以早少少同佢地入場霸位,
點知佢地因為未食lunch, 所以去左八八八拉麵館食野,

吳祺禮好心急入場(因為冇劃位), 點知阿Mung又勁姿悠食得勁慢,
搞到我同吳祺禮兩個上大球場先, 佢兩個慢慢食.
我地到達大球場已經五點幾, 三樓好多位已經俾人霸晒,
最後我地坐到去三樓既中間, 真係廁所都唔係好願去, 費事行上行落.
頭場阿士東維拉vs布力般流浪, 由於兩隊D球員都唔係好識, 所以唔太投入.
一到左尾場傑志vs車路士, 當堂成個人醒晒.
好多星都有落場, 萬眾期待(at least我係)既費托都o係下半場出場,
好可惜佢真係冇態得好緊要, 對住傑志都入唔到波, 真係激死!!
最後傑志都輸0:4, 阿Mung爭吳祺禮一餐了 (佢地賭車仔讓兩球半)
散場時又迫又熱, 足足搞到十二點先返到屋企咁滯.
仲有睇睇下波KC send msg俾我問我有冇入場, 原來佢見到阿Mung o係facebook個post,
原來佢都有入場睇, 不過坐我地對面呢,
佢問我聽日(星期四)睇唔睇香港隊喎, 小西灣真係要諗諗先喎.
~~~~~~~~~~~~~~~~~~~~~~~
星期三睇完車仔, 星期四好癲咁又入場睇波, 今次睇香港隊世界盃外圍賽.
晏晝終於決定都係入場支持香港隊, 即刻打俾阿俊攞飛啦,
奇怪既事情發生了: 聽聞阿俊自己係教練, 因咩解究會叫我打俾佢老豆呢?
okok打就打啦, 最後都有飛, 不過我地遲晒到, 唔知佢老人家有冇唔高興.
卒之搞到八點先o係office走(八點係開波囉...), 我飛的士入去小西灣只係需時6分鐘!!!!
一去到打俾迪爸, 總係覺得佢有D唔高興咁, 我已經"耍晒林",
又問佢要唔要飲野, 叫KC買埋入黎, 佢又話唔駛.... 唉我都冇計...
我就8:10入到場, KC仲遲, 8:30到先黎到, 因為臨時約左D細路傾轉校既事喎.
講番場波, 上次作客沙地輸三球, 今次主場.... 估唔到輸五球!
只想講句: 離X晒譜!!!
完場之後, 我地去左太興食飯, 一早佢話佢請既,
點知埋單o個時, 佢唔夠錢俾.... 真係有D"囉", 爭十幾蚊我俾啦唯有... okok.
佢勁解釋因為黎之前同左D細路食野, 所以用左錢又未撳 sth like that,
其實我明喎, 不過佢十級唔自在, 面色變埋, 手又震埋, 哈哈!
咁我唯有話: 俾機會你下次再請過啦.
食完飯佢送我去搭車, 點知等成十幾分鐘先有車喎, 卒之返到屋企又十二點幾.
~~~~~~~~~~~~~~~~~~~~~~

豪華BBQ

約左個幾月既BBQ尋日終於都黎到喇, 奇蹟地冇人甩底喎!
出席人士: Benny & Cindy & Helia, Carol & Simon, Celia, Cherry, Emily, 聰 & wife & 朱巧瑜, Wing & wife, Anthony, Per, May, Patch, Thomas
地點: 深灣軒
事前我地訂左大量海鮮, 豬牛羊雞都有, 嚇死人既份量,
星期五送到公司, benny揸車車番屋企先, 所以我地咩都唔駛準備就可以入去燒喇.
借Emily張相一用先:

~~~~~~~~~~~~~~~~~~~~~
早幾日開始打風, 大家都擔心會唔會落雨, 不過好彩天氣唔錯,
一黎我地就開始燒扇貝, 虎蝦, 聖子!! 好味到不得了呀!!


燒既期間刮起大風, 成張椅可以吹左上花槽, 我地夾手夾腳撳住D野唔好飛走,
之後仲忽然間落起傾盆大雨, 勁狼狽咁搬D野去有頂既地方....
落左半個鐘唔夠, 就轉番天晴喇, 可以繼續燒.
只可以講句, 飽到上心口!!!
講完野食, 要講下兩位可愛既小朋友: Helia同朱巧瑜.
Helia好勁完全唔怕生保, 又岩岩學識講少少野, sweet到爆炸,
朱巧瑜就比較怕醜同嗲, 成日都攬住爸爸媽媽,
最搞笑既係, 佢一見到Benny就喪喊, 原因係Benny連叫佢4次朱家瑜,
之後佢喊住話: 我係朱巧瑜呀!!!
哈哈哈哈哈哈哈!!! 我估朱巧瑜會有童年陰影囉.
~~~~~~~~~~~~~~~~~~~~~
食完野之後, 我地上Benny屋企坐一陣, Helia返到屋企仲更加生猛,
走來走去, 又表演跳舞(同Benny一齊跳 @.@)
Helia仲一度指住Thomas話: 叔叔係鴨鴨 (因為Thomas著住件黃色衫, 同鴨鴨係一樣色既)
Thomas好無奈咁接受左.... 哈哈哈.
佢地打左一陣PS3賽車, 大概7:00我地就走喇.
~~~~~~~~~~~~~~~~~~~~~~

Rest In Peace

今朝返到公司, 第一時間睇下D魚仔如何,

點知我只係見到一缸水.... 魚魚不見了.

呢個時間, Celia彈起身同我講:

「你唔好激動, 我地返到黎見到佢地死左, Thomas幫你處理左喇, 費事你見到唔開心.」

唉, 其實over the weekend我都有預感佢地會唔得.

不過我真係好多謝Thomas幫我處理左佢地既body,

如果我見到佢地死o個個樣, 我諗我真係好唔開心.

同埋我都覺得好guilty呀, 買佢地返黎整死佢地咁......

而Thomas自己兩條魚, 返到公司死左一條, 死因係俾水草纏住左o係水面....

到before lunch既時間, 另一條都死埋lu.

反而Carol o個兩條依然好活潑, 所以我決定lunch time要去買過兩條,

唔好貪心買金魚, 要買細魚仔, 好好咁養佢地!

去到水族館, 見到D金波子真係好cute, 不過我要忍手 (雖然老闆娘話波子好襟養.....),

最後買左一對叫做藍眼燈既小魚, 希望佢地可以生生猛猛啦!

Thomas都買左一條叫做非洲王子既魚仔, 鮮黃色好靚架,

佢仲買左個大缸, 宜家最靚係佢o個set, 哈哈.

~~~~~~~~~~~~~~~~~~~~~~~~~

金波子

公司桌面繼擺左好多小植物之後, 尋日又多左新成員喇,
今次係識郁架: 金波子 X 2

其實都唔係第一次養魚, 細個o個時屋企有一大缸, 有大魚有細魚有錦鯉,
有晒成套氧氣Bump, 過濾器, 燈呀, etc. 不過最後都送左俾人.
今次養呢兩條小魚, 只係幫佢地準備左水草, 希望養得到啦.
(宜家呢個moment我真係有D掛住佢地呀)
Carol同Thomas都一樣各自買左兩條魚, 三種魚三種唔同性格.
~~~~~~~~~~~~~~~~~~~~~~
話說星期二本身要上詠春既, 不過vivi唔得閒所以改星期五,
估唔到星期五原來咁少人上堂喎, 應該得十個到, 星期二應該接近廿個.
助教們都不在, 所以都係師父親自教, 同一時間亦代表我地冇乜休息既機會...
今堂首先練扯拳練左半堂, 之後就學新動作去推開對手出拳,
呢下我真係覺得有D難呀, 唔係每次擋完唔記得收番隻手, 就係個身唔夠直,
又係顧住轉馬喎, 睇黎真係要勤力D練習先得.
經過四堂之後, 我覺得最進步就係紮馬好似已經冇咁辛苦咁.
講番今日上堂, 真係好多笑位, 可能人少, 互動會多D.
笑位一:
話說我地有個同學, 係一個年紀比較大既男士,
上一堂師父衝口而出叫左佢做阿叔, 我地忍笑勁辛苦啦,
到今日師父問我地佢係咪vivi既同事, 原來佢唔見左冇黎上堂喎,
一講起阿叔, 我地又再次勁笑, 今次仲唔駛忍, 幾乎笑到耍唔到拳.
笑位二:
耍耍下小念頭, 師父突然間話有一日撞到vivi, 仲要講埋係深水埗囉, 哈哈!!
笑位三:
今堂有個新同學第一次上堂, 師父同佢講解理論既時候, 叫埋我地一齊聽,
講開話詠春係實際既, 唔會擺咩姿態呀, 碌地沙呀咁,
講講下突然間黎一招雙手上下張開既黃飛鴻Pose喎!
笑位四:
講起另一種"武術"太極, 師父話試過有人同佢講, 打一拳可以打到佢"夏天都要著棉襖"
我完全未聽過呢句說話囉, 知道點解之後覺得個gag好爛好誇, 哈哈.
笑位五:
師父突擊測驗, 問我地點解護手既時候, 係肘帶手番, 前臂唔收,
好明顯我同Vivi都唔記得左啦, Vivi求其up左兩句咩卸力咁, 之後被秒殺左,
師父仲話佢一定冇講過係咁樣, 哈哈哈哈, 下次真係要打醒十二分精神.

下星期我地都係星期五上堂, 雖然Friday night黃金時間冇得去玩,
不過上堂少人D真係好好多, 起碼少左兩個師奶成日依依哦哦,
我地尋日都由七點九上到九點九先落堂, 真係抵到爛.
~~~~~~~~~~~~~~~~~~~~~

羅輯課

carol去完北京旅行, 帶俾我既手信竟然係一本書 - 小豬寫既《羅輯課》
呢本書應該半早幾個月已經出版, 不過一直都冇好強烈既意欲想買.
咁岩carol送俾我, 當然勁開心可以睇下小豬究竟可以寫到本咩書出黎呢?
之前睇訪問已經知道呢本書係關於羅媽媽教佢既街頭智慧, 做人道理,
甚麼有D內容o係訪問入面都有透露少少.

看完小豬寫的羅輯課，確實比想像中要好看。一直以為當藝人的不會​寫得出甚麼好東西，還不是一本又一本圖畫比文字還要多的畫冊吧。​剛​好朋友送我這本書，一看之下竟然有驚喜！二十四課當中，有感動的​、有共鳴的、有當頭棒喝的……全都是一些人生經驗，一些書本裡沒​有教你的故事跟道理，希望大家有機會可以看一下。

~~~~~~~~~~~~~~~~~~~~~~~~~~~~~

舞法舞天一萬零一夜香港站演唱會

岩岩呢個星期日真係好豐富, 本身應該跟時序寫既,
不過今次例外, 因為我好想寫左我既至愛小豬先.
~~~~~~~~~~~~~~~~~~~~~
多得vivi幫我地買到飛, 先唔駛miss左呢場"舞法舞天一萬零一夜香港站演唱會"!!
雖然只係$480飛唔係$780, 不過因為四面台既關係, 都唔覺得離台太遠.
8:30開場, 一開場小豬從天而降, 第一首歌係獨一無二only you,
佢套衫好cyber好靚, 不過呢隻舞我都係覺得著西裝跳會型D.

之後就係一輪快歌, 舞法舞天, 精舞門,
慢歌就有Touch My Heart, 敗給你.
如果冇記錯, 好似呢個時候就到嘉賓容祖兒出場,
佢地唱左戀愛達人, 小豬換衫既時候, 容祖兒唱空港(to我黎講完全係飲水位).
上次演唱會有一part係向舞后致敬, 今次就改為偶像劇回顧,
播左幾套佢主演既偶像劇既片段, 分別係鬥魚II, 轉角遇到愛, 籃球火, 海派甜心,
緊接就當然係唱主題曲/插曲啦: 灰色空間, 愛轉角, 幸福不滅, 愛不單行.
偶像劇session之後, 就唱左新碟入面既美麗的誤會,
上次佢o係百份百唱呢首既live唱得麻麻地, 今次好好多啦.
跟住又到番快歌, 唱左頭髮亂了, 嗆司嗆司同埋狐狸精.
播左一陣片, 就唱拼甚麼 (呢度又係佢既fans先會明白既感動位)
再黎係好朋友(呢part勁呀, 佢去左個台既corner位, 升到幾層樓高, 見到都腳軟)
黎緊呢part真係好感動, 因為全場大合場我不會唱歌,
呢隻歌其實音域好廣, 粉絲自己唱的話, 前面低音會升左key, 一到chorus一定唱唔掂,
後尾小豬帶一帶就"正常"番, 唱完之後好感動呀! (我知我隔離o個三位應該feel唔到, 哈哈)
跟住係習慣就好, 我超like呢首歌呀!!
佢平時live唱通常有一兩個音未必到, 又或者唔穩, 不過今次勁呀, 全真音上晒!
休息一陣, 又黎勁歌熱舞: 一萬零一夜, 愛的主場秀, 一枝獨秀, Twinkle.
(一枝獨秀最尾tic tac舞部分, 佢o係一個小水池上面跳, 應該係sexy爆既,
不過因為o係我地既大對角, 仲要睇背脊, 所以有DD失望)
呢part完, 好快叫做encore左少少, 就出番黎唱愛瘋頭同埋撐腰.
演唱會就係一個勁開心既氣氛之下圓滿結束.
~~~~~~~~~~~~~~~~~~~~~~
場館開晒燈, 我地都唔走, 因為十一點都未夠, 同埋應該可以再encore架嘛,
點知我地嗌左十幾廿分鐘都冇再出黎lu..... 平時佢就算換晒衫, 都會出黎講兩句架嘛....
我真係好鍾意聽小豬講廣東話, 佢D廣東話係爛到一個地步每一個音都係錯既,
再加埋佢半桶水既英文真係笑爆咀!
"斬臍lai嘛" 站起來嘛
"mountain的people" 山頂既人
"有冇搞錯架嘛"
"第依次" 第二次
"~~~~~~~~~~~~~~~~~~~~~~
完整rundown:

1. 獨一無二only you,
2. 舞法舞天
3. 精舞門
4. Touch My Heart
5. 敗給你
6. 戀愛達人
7. 空港(容祖兒)
8. 灰色空間
9. 愛轉角
10. 幸福不滅
11. 愛不單行.
12. 美麗的誤會
13. 頭髮亂了
14. 嗆司嗆司
15. 狐狸精.
16. 拼甚麼
17. 好朋友
18. 我不會唱歌,
19. 習慣就好
20. 一萬零一夜
21. 愛的主場秀
22. 一枝獨秀
23. Twinkle.
24. 愛瘋頭
25. 撐腰

~~~~~~~~~~~~~~~~~~~~~~
可以講番演唱會之前做咩喇,
我地一班同事約埋去澳洲牛奶食早餐, 排晒隊不過好快入得去,
D伙計仲惡過蘭芳.... 哈哈, 成間餐廳都好似play緊fast foward咁,
搞到我都不期然食得好快....
食完野就去King's Park睇DBS CBG Basketball Tournament,
我地cards有patch, per, thomas, calvin, kevin, wallace, kenneth做代表,
佢地第一場打得好好呀, 不過之後既四強賽因為體力下降而變得被動,
最後法定時間打和, 原來籃球都有十二碼, 仲係即時死亡制.
patch本來射入架, 不過俾球證吹踩界叛唔入... 跟住對手射入, 就係咁入唔到final.
季軍賽佢地既對手本來唔強, 不過我地唔係咁集中, 再加上冇氣既關係,
最後都係輸埋, 得梗頸四.
Anyway成個比賽好有火好熱血, Like!
借carol張相一用:

~~~~~~~~~~~~~~~~~~~~~~~

廣州遊

期待左好耐既廣州遊終於都到喇, 我地一行七人浩浩蕩蕩上廣州!
今次同行既有carol, vivi, per, anthony, wing, francis,
本來patch都好想黎架, 不過佢老婆就生, 所以黎唔到.
~~~~~~~~~~~~~~~~~~~~~~~~~~~
我地一齊由上水出發, 到深圳坐和諧號, 第一次坐, 原來都真係幾靚.
D位仲要超闊, 我伸直晒對腳都踩唔到個腳踏.....

坐左唔記得幾耐, 好似個幾鐘就到左目的地廣州東.
第一個令我大開眼界既, 竟然係個的士站!
做咩事三條行車線都可以上車? 仲要前面架車唔知做咩冇客上, 後面D車就塞死晒.
我地分兩架車去小洲村, 不幸到我地冇講實落車會合既地點,
卒知我地一個村頭, 一個村尾, 行幾耐先會合番.
坐低食D野, 就真係入村.
當日廣州35,36度, 烈日當空, 我地行下影下相, 真係熱到喊, 仲要拎埋行李喎!
真係不得不佩服我地既活力!

~~~~~~~~~~~~~~~~~~~~~~~~~~~~
遊完小洲村, 就搭巴士去電視塔, 呢度又係另一個經典...
話說架車好少乘客, 到落剩我地同另一個男人既時候,
司機問個男人去邊, 之後早左叫佢落車, and then再問我地去邊,
佢知道我地去電視塔之後, 竟然車到我地去電視塔樓下喎! (本身個站唔係咁近)
巴士都可以咁flexi, 真係flexi-travel!
上電視塔要收RMB150, 我地當然唔俾, 所以就去左出面影外圍.

呢個位搞左好耐, 因為要將一個人影得宏偉並唔係一件咁易既事,
睇下佢地影到幾乎瞓地就知咩事, 哈哈哈哈!

~~~~~~~~~~~~~~~~~~~~~~~~~~~~~
影完電視塔, 終於都拖住疲累既身軀返酒店, 因為個袋好重呀!
(背囊被爸媽拎左去用, 我要用側揹袋, 超辛苦)
我地入住既係位於沙面既勝利賓館, 呢間酒店好靚呀, 服務又好喎,
我地問front desk房入面有冇wifi, 佢話冇,  不過可以送個router上房俾我地!
就係咁, 我地三間房就分兩個router, 正死!
稍為休息一陣, 我地就用whatsapp召集出發,
o係香港既阿聰都忍唔住send message問: 其實都見住, 駛唔駛whatsapp呀?
well, 呢種習慣係改唔到既...
晚餐我地食海鮮呀, 我都唔識揀, 所以都懶得行去揀, 一於等食.
食飽就去按摩, 按摩完都經已成點鐘喇....
我地按原定計劃去酒吧街, 去到珠江河邊一間露天既酒吧坐低,
用左十幾分鐘時間, 飲左一支香檳, 食左D串燒同芝士就要走喇.
(因為人地01:30打烊, 我地01:05都仲死要坐低)

酒又飲埋, 點知我地既行程係未完架!! 因為我地有咖啡券, 可以o係酒店cafe飲野.
我地又坐低飲茶食餅, 因為有wifi既關係, 我地又再次相對無言.....
茶都飲埋, 終於真係上房沖涼瞓覺喇, 我第一個沖涼, 落床都已經三點.
~~~~~~~~~~~~~~~~~~~~~~~~~~~~~~~
第二日, 十點鐘出發, check-out酒店就去泮溪酒家飲茶,
不過因為太多人關係, 攞左飛之後我地行左去附近既荔枝灣影下相.
又係曬到爆標既天氣, 不過都係因為好天氣先影到靚相既,

到十一點鐘到, 我地就返去酒樓食野, D野食普通啦, 不過出名既酒樓都應該食一次.
唔"好"食粥既我, 都要食下荔灣艇仔粥, 哈哈.
食完野就繼續影相, 參觀左西關大宅同附近既建築.

~~~~~~~~~~~~~~~~~~~~~~~~~~~~~~~~
離開荔枝灣, 就搭巴士去上下九街,
呢度其實似旺角西洋菜街, 不過叫賣聲嘈十倍!

佢地有收鑊呀, 買左DVD同CD, 我就冇乜興趣, 最good都係佢地揀野時我涼下冷氣.
行完步行街, 就搭地鐵去唐苑食個早dinner,

唐苑係o係流花東苑入面既, 呢間高級食肆都幾搞笑...
話說我地叫左可樂, 佢有本事黎一支唔凍架囉!
唔係我地叫佢俾D冰, 佢都好似好理所當然係唔凍既咁.
我地隔離檯一家三口, 叫左三兜魚翅, 而我地七個大人, 係叫焗魚腸....
野食都係普普通通, 不過坐得舒服就真既, 唔迫又唔嘈.
~~~~~~~~~~~~~~~~~~~~~~~~~~~~~~~~
食完晚飯大約六點零, 就起行去番廣州東火車站, 搭宜直通車返香港喇.
第一次搭直通車, 原來真係幾方便同快,
最重要係咩呢, 就係我地o係"中港直通車高級軟座"撞到國際巨星田雞!!!
呢下真係超頂癮, 雖然唔係真係田雞但都有八九成似,
最重要既係.... 可以同某D人"睇齊"! 哈哈哈哈哈哈!!!
一入番香港境, 收番3G, 我地又再陷入沉默之中,
最嘈都係我地拎阿Wing部電話check-in o個下, 真係笑爆咀.
~~~~~~~~~~~~~~~~~~~~~~~~~~~~~~~~~
兩日一夜廣州行完滿結束, 好累不過好開心, 呢班人真係好好玩,
唔知下次係唔係真係一齊去張家界呢?
~~~~~~~~~~~~~~~~~~~~~~~~~~~~~~~~~