所以返到酒店已經冇精神打blog, 我宜家坐o係機場閘口, 對住個apron打blog.
第四日, 我一個行程係上耶穌山, 呢一part都係我最期待既,
天氣唔熱, 陰陰天咁, 不過想落雨就比較焗, 一滴風都冇,
導遊話要上七百幾級樓梯, 都唔算好辛苦, 不過都大汗dup細汗.
沿路上都好多雕塑, 例如聖母呀, 十二門徒呀咁, 唔知點解我諗起澳門.
上到頂之後, 應該係有得入去再上到耶穌個膊頭既,
不過唔知做咩冇開門喎, 咁都冇辨法, 影多一輛相就走啦,
一路行番落去, 回頭一望見到耶穌個膊頭有D人影既??
即刻再上番去睇下啦, 好彩我地返轉頭咋, 宜家有得入去喇...
一入去, 嘩D樓梯真係窄到喊, 仲要有人上又有人落,
搞到要同D成身汗既人不斷咁擦身而過....
幾經辛苦上到頂, 觀景個位真係超超超細, 企3,4個人都已經唔郁得.
不過上到去o個個感覺都幾特別, 涼風陣陣, 居高臨下, 都幾舒服.
~~~~~~~~~~~~~~~~~~~~~
行完耶穌山, 就去參觀鯨魚廟(南海翁陵)
話說係一條船出海失事, 俾人條鯨魚托住艘船返岸,
點知條鯨魚自己就出唔返海, 死左.
咁之後D人就起左個廟供奉呢條鯨魚, 仲將條鯨魚D骨放o係廟入面.
睇完廟, 就坐三輪車遊一遊同車我地返酒店, 其實都冇咩風景睇,
不過都坐得幾舒服既(除左尾段曬住有D熱之外), 起碼冇架旅遊巴咁"登"到痴肺.
返到酒店即刻沖涼啦, vivi就落左去酒店隔離個海灘影相.
~~~~~~~~~~~~~~~~~~~~~~
沖完涼食埋晏, 就出返去胡志明市.
去左歌劇院, 總統府同埋胡志明雕像度影下相,
呢度真係叫加插一part妙語連珠:
團友: 歌劇院係做咩架? 做話劇呀? (-_-")
領隊: 做歌劇.
又係影完一輪相, 之後就去左食雪糕啦, 妙語連珠part 2:
團友問導遊有咩味道推介, 導遊就介紹椰子同桑子.
好明顯桑子rasperry, 首先唔知做咩成團都冇人識, and then...
團友(又係o個個): 桑子係hazelnut (-_-")
團友個仔: 好似唔係喎...
團友: 係呀, 係hazelnut.
我同vivi已經互交眼色... 最後唔知係有人提佢定係佢自己醒覺hazelnut係榛子.
講番個雪糕, 都幾精緻, 不過又唔係話非常難忘o個隻既...
之後就晚餐, 又係好豐富不過唔係太岩食, again最好食都係春卷.
明明好飽架啦, 返到酒店之後都要再落街食番碗牛肉濛粉,
一場黎到越南, 唔o係街食一碗, 好似爭D咁....
我地去左一間克林頓都幫襯過既, 不過又唔覺得好好食喎,
D牛肉有D硬, 好似牛展咁, 食完之後就拖住疲累既身軀(同飽飽既肚)返酒店.
~~~~~~~~~~~~~~~~~~~
最後一日行程, 基本上執好行李, 食完早餐就出發去機場.
早餐我地都仲要再食牛肉濛粉, 呢幾日計埋都食左四五碗濛粉,
相信我短期內都唔會再食濛粉/河粉類既東西, 哈哈!
成個trip, 計埋手信各樣駛費, 都係$1200鬆D, 加埋$500小費都係$1800有找.
越南D野都算平, 又冇咩貴野好買,
唔同我地有D團友天生購物狂, 人地幫襯領隊買扎肉o個D都好正常,
佢連海蔘/花膠都買, 仲係大量o個隻, 加埋每個景點都買到一袋二袋, 誇到爆.
另一樣野好好笑既, 就係D團友們全程都叫我地做"小妹妹", 哈哈哈哈.
以我地既年紀, 叫我地做"阿妹"都仲ok, "小妹妹"真係誇D呀?
打到呢度, 都差不多上機喇, 越南之旅圓滿結束.
~~~~~~~~~~~~~~~~~~~
沒有留言:
發佈留言